गलती से सीखव

कहिनी

मनखे ह गलती के पुतला आय। जिनगानी म छीन-छीन म गलती करथंन, गिरथंन, उठथंन, फेर आगू बढ़थंन। गलती होय ले घबराय बर नइ चाही, बल्कि वोकर से सीख लेके आगू बढ़े बर चाही। इही हमर सफलता के निसानी होथे। कोनो मनखे होवय जेन ह कहिथे के, मेहा कभु गलती नइ करेंव अंव, ऐकर मतलब इही कहे जा सकत हे के वोहा अपन जिनगी म कोनो नवा काम करे के कोसिस नइ करे हे। जेन ह नवा काम करथे वोकर से गलती घलो होथे अउ उही गलती से सीख लेके आगू बढ़थे। दूसरइया पइत गलती नइ करे बर चाही।
जइसे बलाधि रिसि के नानकीन बेटा के अचानक मउत होय ले वोहा बड बिचलित होगिस। वोहा देवराज इंद्र के नांव तपसिया करके अमर बेटा के मांग रखिस। इंद्र भगवान ह ए कहिके मना कर दिस के मानूस तन म अमर होवइ संभव नइये। दूसर बरदान मांगे बर कहिस। रिसि ह सोच के मांगिस के हे भगवान! मोला अइसे बेटा दे के वोहा तब तक जियय जब तक के आगू के परबत ह अचल खड़े हे। इंद्र ह तथास्तु कहि दिस।
कुछ महीना बाद वोला पुत्ररत्न मिलिस। जेकर नांव मेघावी रखिस। लइका बाढि़स तहां ले वोकरमन म घमंड आ गे। अतियाचारी, निसाचरी होगे। बलाधि रिसि ह अपन बेटा ल समझाइस के अहंकार ह मनखे के पतन अउ नास के कारन होथे। भगवान के बरदान ल गलत डहर झन लेग। रिसि ल अपमानित करके बेटा ह घर ल छोड़ दिस।
रद्दा म मेघावी ल रिसि धनुसाक्छ मिलिस। वोकर ले गलत बेवहार करिस त वोहा वोला तुरते मउत के सराप दे दिस। फेर, बरदान के सेती वोकर मउत नइ होइस। तब रिसि धनुसाक्छ ह अपन बिद्या, गियान ले हाथी रूप धरके पहार ल तहस-नहस कर दिस। पहार के गिरतेच मेघावी के मउत होगे। ऐकर जानबा बलाधि ल मिलिस त दुखी मन से बोलथे- मोला अमर बेटा पाय से बने तो सदाचारी बेटा होतिस त जादा संतोस मिलतिस।
मनखे के गलती करे से वोकर उप्पर गहरा परभाव परथे अउ उम्मीद के उल्टा वोला फल मिलथे। जिहां हमन काम करथन उहां घेरी-बेरी गलती करे ले नउकरी जा सकथे। रिस्ता म घलो दूनों परानी के बीच म संका अउ गलती समाइस त जिनगानी ल बरबाद करके रख देथे। रुपिया-पइसा ह घलो जबान के गलती से बड़े नुकसान पहुंचा देथे। घेरी-बेरी गलती करे से धीरे-धीरे सब दरवाजा बंद हो जथे। सही कहिबे त गलती ह मनखे ल सुधार के, बने रद्दा म चल के, मेहनत कर के सुग्घर जिनगी बिताय अउ आगू बढ़े के सीख देथे।