नदावत गुरु-सिस्य परंपरा बर जिम्मेदार कोन?

जिम्मेदारी ले दूरिहावत हें

स च्चाई, ईमानदारी, छिमा, जवाबदारी सिखइया गुरुजी एक कोती अपन करम ले बदनाम होवत हे अउ दूसर कोती समाज म अइसे बेवस्था बनत हे के गुरुजी अपने काम ले दूरिहात जावत हे। पहिली गुरुकुल, पाछू पाठसाला, मदरसा ह लइका के सबो बिकास के जगा राहय। फेर, अब इस्कूल ह खाय अउ समे बिताय के जगा बन गे हे।
गीत-संगीत, नाच-गान के कला अब लइका टीवी ले सीखथे। आज जउन ल टीवी अउ इंटरनेट म देखथे उही ल सीख जथे। गुरुजी के बात ल कान नइ धरंय। गुरुजी थोरकुन कुछु कहिस त दाई-ददा अउनेता, सरपंच ह आ जथे। ऐकर सेती गुरुजी चुप बइठ जथे। दूसर कोती आज गुरुजीमन घलो अपन धरम नइ निभावंय। पहिली गुरुजी के मान-गउन, वोकर बेवहार, आचार-बिचार, सलाह-सुझाव, गोठ-बात, पहिनावा-ओढ़ावा ले होय। गांव के सबो धरम के काम, तीज-तिहार, उछाह-मंगल के काम म वोला पूछे जाय। बर-बिहाव, मरनी-हरनी, छठ्ठी-बरही म वोमन ल नेवते जाय। फेर, आज गुरुजीमन गांव ले दूरिहाय गे हावंय। गांव के मनखेमन गुरुजीमन ल नइ चिनहंय। सरकारी नीति घलो ह ऐकर बर कुछ हद तक जिम्मेदार हे।
गुरु के महिमा ल मेटत हावंय
आ ज जइसने गुरु वोइसनेच चेला हे। दूनों ल अपन मान-सम्मान के परवाह नइये। गुरुमन के चरितर गिरत जावत हे। गुरु ह बने रइही त वोकर चेला ह घलो बने रइही। समाज ल बनइया गुरुजीमन समाज ल बिगाड़त हें। गुरुजीमन दुराचारी, अतिचारी होवत हें। गुरु के महिमा ल मटियामेट करत हें। आजकाल के गुरुमन के कोनो भरोसा नइये। न गुरुमन ल मरयादा भुले बर चाही, न सिस्यमन ल। गुरु-सिस्य परंपरा ल निभाय के जिम्मेदारी दूनों के हे। फेर, गुरुमन के ऐमा जादा दोस हे। काबर के वोकर जवाबदारी जादा हे। जब गुरु ह खुदे बिगड़ जही त बिगड़े लइका ल कइसे सुधार सकही।
सिक्छा ह समाज के पहिली जरूरत आय। ऐला देवइया गुरु ह आय। सिक्छा हे तभे मनखे अउ पसु म भेद हे। फेर, आजकाल इस्कूलमन दुकान अउ सिक्छा ह बेपार बन गे हे। वोकर सेती मनखे के रद्दा छोड़के पसु के रद्दा म रेंगत हे। गुरु हो चाहे सिस्य दूनों ल नैतिकवान, चरित्रवान, ईमानदार होय बर चाही, तभे गुरु-सिस्य के परंपरा ह कलंकित होय ले बांचही। गुरु के मान-सम्मान होही।