कुथरेल के जलेन्दरी बाबा

आवव मोर गांव

दु रुग जिला ले चार कोस दूरिहा म दुरुग-बालोद रोड म कुथरेल गांव बसे हे। पहिली जमाना म गांव के नांव कोथरेल रहिस। गांव के उत्ती डहर जलेन्दरी नांव के तरिया हे। तरिया के बीच म मंदिर हे। पानी म तउर के मंदिर म जाय बर परथे। तरिया पार म बर रूख के खाल्हे सिवलिंग बिराजे हे। गांव म परंपरा हावय के कोनो दुलहिन आथे त पहिली जलेन्दरी बाबा के पूजा-पाठ करथें, तब घर म परवेस करथें।
सियानमन बताथें के अढ़ई सौ बछर पहिली गांव म एकझन बाबा आय रहिस। वोहा गांव के बाहिर म डेरा जमा रहय। लोगनमन अपन दुख-पीरा ल बताय त वोहा दूरिहा कर दय। डेरा के तीर म एकठिन तरिया रहिस। वो तरिया के पानी कभु नइ सुखावत रहिस। वोकर पानी ल पीये बर उपयोग करंय। तेकर सेती बाबा के नांंव जलेन्दरी बाबा परगे।
सियानमन के बिसवास हे के जलेन्दरी बाबा ह आजो गांव के रखवाली करथें। रातकुन सादा घोड़ा म बइठके गांव म किंजरथे। वोहा गांव के सियानमन ल तरिया म मंदिर बनाय के सपना दीस। तब गांववालेमन मिलजुल के तरिया के बीच म मंदिर बनाइन। वो मंदिर आजो हावय।