बिहाव के लाड़ू

कहिनी

दिल्ली के नौकरी माने चालीस हजार रुपिया महीना। तभो ले बिहाव नइ कर सकंव, कुछु बाचबे नइ करय। बहुत महंगा राजधानी हे। जब-तक लाख रुपिया के आसपास तनखा होही तभे फेमिली गुजारा होही। राहुल अपन ददा राजीव ले मोबाइल म गोठियात रिहिस।
राजीव कहिस- देख बेटा, मेहा रिटायर होगे हंव। ए सातवां वेतन म पेन्सन 36 हजार हो जही। भन्सुली म सतरा एकड़ खेत हे। छोड़ दे दिल्ली के नौकरी ल। घर आजा। इहें कमा लेबे। तोर दाई घलो नइये। बेटा ल समझात-समझात राजीव ह रोवासी होगे। राहुल कहिस- ठीक हे ददा, आपमन अकेला हो। अब मोला आपके संग रहे बर हे। जल्दी सब सकेल के आए के जतन करत हंव। ठीक हे बेटा, इहां छत्तीसगढिय़ा राज आ गे हे। कोनो संसो झन कर। रायपुर ल दिल्ली बना सकत हस। डाबर कंपनी के मैनेजर राहुल दिल्ली म तीन बछर से काम करत हे। वोकर संग नौकरिहा संगवारी ईसा दिन-रात जुड़े रहिथे, माने पक्का दोस्त ए। ईसा ह मोबाइल म गोठ-बात सुन के समझगे। वोहा कहिस -दिल्ली के हवा म जहर घुरत जावत हे। सांस लेवई मुसकुल होवत हे। चल अच्छा हे छत्तीसगढ़ जाबो, उहेें कमाबो।
राहुल धुकधुकी ले उबरे बर पूछिस- तोर दाई-ददा तोला भेजे बर तियार हो जही? ईसा कहिस- मोर ददा विद्याचरन सुक्ला संग रायुपर से दिल्ली आए रिहिस। मोर दाई तको महासमुन्द के रहवासी ए। बिहाव के बाद दिल्ली के नौकरी बर इहां रहिथन। मोर जनम 25 दिसम्बर के होय रिहिस। तेकर सेती ईसा नाव रखाय हे। हमन बन्छोर लिखथन। मेहा वहू नइ लिखव। सब ईसा लिखथव। राहुल कहिस- वाह! तीन बछर के मितानी के बाद पहिली पइत अतेक जाने हंव। कभु पूछे घलो नइ अंव। अइसे हमन कुरमी हरन। लिखे बर वरमा लिखथन।
ए डहर कायस्थ, सोनी, बिहारीमन ह वरमा लिखथें। मेहा तो जानत रेहेंव तुमन कुरमी अव। काबर के तुम्हर घर के अथान के कुर खाके जानगेंव कुरमी अव। चलव आज मेनेजमेन्ट के मिटिंग हे।
डाबर कंपनी के बड़े-बड़े डायरेक्टर मिटिंग म रिहिस। राहुल सबके आगू कहिस – मेहा डाबर बर दवई के पौधा खातिर खेती करे बर चाहत हंव। मोर तीर सतरा एकड़ जमीन हे। थोकन म खेती सुरू करे बर हे। सफलता मिलही त दूसर किसानमन घलो दवई पौधे लगाके लाभ कमाहीं। मेनेजमेन्ट ह आपसी बातचीत करके कहिस के राहुल ह अपन खेत म कंपनी बर दवई बनाय के पौधा के खेती कर सकथे। ऐकर बर दिल्ली के तीर-तखार के किसानमन से जानकारी ले लेवय।
राहुल घर आके अपन ददा ल फोन करके गोठियाइस। वोकर ददा खुस होके कहिस- हमर गांव के किसान ह मुख्यमंतरी बन गे हे। सासन डहर ले सहयोग मिल सकत हे। तेहा इहां आजा। तोर बिहाव घरो करे बर हे। राहुल कहिस- बिहाव के बारे म आपमन जादा झन सोचव। मेहा आतेच बिहाव कर लुहूं। अउ मनेमन ईसा के बारे म सोचे लगिस।
ईसा के फोन आ गे। राहुल मिटिंग से लेके घर अउ बिहाव बर तको कहि दिस कि गांव जातेच बिहाव करे बर हे। ईसा हांस के पूछिस-गांव म ददा ह बहू देख डरे हे का? राहुल कहिस- नइ-नइ, मेहा दिल्ली म देखे हंव। सांझकुन तियार रहिबे तोर घर आवत हंव। संगरा चलबो। ईसा असमंजस म सोचत-सोचत जान नइ पाइस कि राहुल दिल्ली म कहां लड़की देखे हे। सांझकुन राहुल ह ईसा के घर आइस। वोकर दाई-ददा के पांव पर के बैठक म बइठ गे। ईसा भीतरी म रिहिस। वोला हांक पार के बुलाइस।
राहुल कहिस- कहां तक पढ़े हस? का-का सउंक हे? गाना गाके सुना? ईसा नजर उठा के देखिस अउ राहुल कठल के हांस डरिस। वोकर दाई-ददा ल कहिस- मेहा ईसा से बिहाव करे बर चाहत हंव। बिहाव के बाद छत्तीसगढ़ म गांव म रहिबो। अगर आप के आसीरवाद मिलही तब। ददा कहिस – ईसा बताय रिहिस कि आप कोनो लड़की ल देखे बर जवइया हव। फेर ईसा के हाथ मांगत हव। मेहा दिल्ली म ईसा ल छोड़ के कोनो ल नइ जानंव। ईसा खुस होगे हे। नवां लड़की के बारे म सोच -सोच के हलाकान होगे हंव। अब जान म जान आइस।
राहुल ईसा के दाई-ददा से बात करिस। वोमन कहिस- बेटा ए दिल्ली म अब मन नइ लगय। बूढ़तकाल म अपन राज अच्छा लगथे। चलो वापसी बागबहरा जाबो। चार एकड़ खेत हे। अधिया म बोवाथे। महूं ल 28 हजार पेन्सन मिलथे। काफी हे। बस ए घर ल बेचे बर हे। ईसा के बिहाव के खरचा निकल जही। राहुल कहिस- फालतू खरचा नइ करे बर हे। गांव के हिसाब से बिहाव करबो। आप अपन रुपिया फिक्स करवा लुहु। मोर तो एकेझन बेटी ह। सबो तो वोकरे होही। अभी काम म लगाहूं तो काम बढ़त जही। अब तो तहूं मोर बेटा हस। राहुल अतेक खुस होगे कि तुरते मोबाइल वीडियो म अपन ददा संग बात करवा दिस। घर बइठे बहू ल देख लिस। समधी से मिल डरिस। बात होगे। अंगूठी पहिना के सगाई तको कर डरिन।
डाबर कंपनी के दवई बर ख्ेाती के जम्मो खातू, बीजा सिंचाई के जानकारी लेके राहुल लिखा पढ़ी करके सबो जतन करके संगे-संग ईसा के घर के सौदा कंपनी के मैनेजर तिरन करके तीन करोड़ के ड्राफ्ट बना लिस। काबर कि घर के साथ बाड़ी तको रिहिस। भन्सुली गांव म हल्ला होइस कि राजीव वरमा के बेटा राहुल के बिहाव ईसा संग होवइया हे। ईसा माने ईसाई समझ के सबो अचरज करे कि ईसाई लड़की ल बहू बनई कतेक बने हे। राजीव काहय, अरे भई! नवां जमाना हे। मोर राहुल बिहाव करत हे भले ईसाई बहू लाय। नइतो मेहा डररावत रेहेंव। मोर बेटा ल दिल्ली के हवा लग जही त कहुं पूर्व परधानमंतरी राजीव गांधी के बेटा राहुल असन बिहाव नइ करही त मोर वंस कइसे चलही।
एकझन सियान कहिस – देख बेटा, हमर किसान नेता भूपेस बघेल छत्तीसगढ़ के राजा बन गे। अब वोकर जिम्मेदारी हे कि हमर उहगद के कका नेहरू के बेटी इंदिरा गांधी के बेटा राजीव गांधी, वोकर बेटा राहुल के बिहाव के जिम्मेदारी राजा भूपेस बघेल के होथे। वो जोर-जबरदस्ती करके भारत म बहू खोज के जल्दी बिहाव मड़हावय। वोकर बाद वोहा परधानमंतरी बनही। इही बात के हड़ताल करबो। फेर अभी तो राजीव वरमा के बेटा राहुल के बिहाव के लाडू खा लेथन। बिहाव के लाडू के मजा गजब आथे।