मय कोन अंव!

गोठ के तीर

ए जहान बनइया ल अतका बड़ देस म रहे बर दू अंगुर भुइंया बर राजनीति के चलत वोला कटघरा म खड़े कर दे गे हे। मोर जनम भूमि अयोध्या आय। जेमा मेहा जिनगी बिताएंव। फेर, आज जाति अउ गोत बताय बर परत हे। जब लोगन के सुवारथ होथे मोर नांव ल बहुतेच जपथें, तहां ले भुला जथें।
ए दुनिया ल मेहा रचेंव अउ मोरे बर ए देस म थोकन जगा नइये। राजनीति करइयामन के मुंहू ताकत हंव। आज सबो डहर जिनगानी दूभर होगे हे। बेईमानी, भरस्टाचार अउ आतंकवाद के राज चलत हे। वेद- पुरान के गोठ नदात हे। ऐमा मनखे के भरोसा नइ होत हे। आजकाल के लइकामन ऐला अंधबिसवास कहिके हंसी उडावत हें। काबर कि मोबाइल के जमाना म ‘गूगलÓ भगवान होगे हे। सबो झन इही म भुलाय हें।
मेहा देखथव सड़क खाल्हे धुररा- माटी म बोथाय मोर मूरत खड़े रहिथे। मनखे मोर दुरगति करत हे। भारत म भुइंया अउ गऊ ल महतारी बरोबर माने गे हे।भारत माता बर महात्मामन अपन जिनगानी कुरबान करिन। भारत जउन ह सोन चिरई रिहिस, आज राजनीति के चलत रोत हे। देस के अन्नदाता लांघन सूतत हे। आत्महत्या करत हे। ‘गऊÓ जेकर गोबर अउ पेसाब ले पूजा करे जाथे, जेकर अंग -अंग म तैंतीस कोटि देवता बिराजथे, वोकरो दुरगति होत हे। गोहत्या होत हे। ‘धरती के घलो अइसने दुरगति होत रइही त मनखे के का होही? मेहा अतका सुग्घर सरग बरोबर दुनिया बनाय रेहेंव। नदिया, नरवा, सागर जेकर बिना मय कोन अंव!मनखे के जिनगी के ठिकाना नइये। मनखे के नासमझी के सेती सबो कोती परदूसन फइलत हे। भारत जेहा सोनचिरई रिहिस राजनीति के भेंट चघगे।
मनखे मोला जंगल-झाड़ी म खोजत हें। रंग-रंग के मेवा, मिठई के भोग लगातव हें। कोनो बलि घलो चढ़ात हे। कोनो चोला रंगाय किंजरत हे। फेर, मेहा हर जीव म समाय हंव। ऐला कोनो नइ समझंय। जब तक अपन ए नासमझी ल नइ छोड़हीं, तब तक अपन अगियान ले बाहिर नइ आ सकंय। ए सब ह मोर दुख के कारन हे।
लागथे महुं ल अपन अधार कारड, जाति, गोत बताय बर जनम धरे ल परही। आज मनखे समझत हे, मेहा कुछु नइ करे सकंव। फेर, मेहा तो तीनों लोक ल देखत हंव। आज मोर दुरगति के कारन मनखे ह खुद हे। इही सेती वोहा अगियान के खोली ले बाहिर नइ निकल पावत हे। अब मेहा का करव? अब तो मोला घलो अपन परिचय पत्र दे बर लागही के ‘मय कोन अंव।Ó