बिटकुला म घरोघर गुरुजी

आवव मोर गांव

बिलासपुर जिला के सीमा से लगे जुन्ना मालगुजारी गांव बिटकुला ह वनछेत्र म बसे हे। इहां हायर सेंकंडरी तक इस्कूल हे। ए गांव ह सिक्छा के मामला म बहुतेच आगू हे। इस्कूल म सिक्छकमन भले कमती रहंय, फेर गांव के जादाकन परिवार म कम से कम एकझन गुरुजी हे। तेकर सेती सियानमन ए गांव के नाव ‘विद्यापुरÓ रखबोन सोचिन, फेर कानून के मुताबिक अइसन नइ हो सकिस। गांव म चारोमुंड़ा धरोहर-सरोवर हे।
गांव के सुरू म बंधवा तरिया, उत्ती म पटवा, गंगाहू म नवा तरिया, रक्सहू म नहर हे। सिंचई के साधन होय के सेती गांव ह पोट्ठ हे। गांव म अमीर-गरीब, जात-पात के भेदभाव नइये। इहां हनुमान मंदिर, स्वयंभू गरेनाइट पथरा के परसिद्ध सिव मंदिर, रक्छीन दाई मंदिर हे। बंधवा तरिया म बिसाल मगरा रहिस जेन ल गांव म देवता मानत रहिन। लइकामन वोकर उप्पर चघ के सिंघाड़ा खावत रहिन। कोनो ल नुकसान नइ पहुंचावत रहिस। इहां के रामलीला अउ गम्मत ह परसिद्ध हे।