नरमदाधाम सुरसूली

आवव मोर गांंव

राजनांदगांव ले 20 किलोमीटर अउ बालोद जिला मुख्यालय ले छह कोस दूरिहा म बसे हे गांव नरमदाधाम सुरसूली। ए गांव ह देवरी अउ नाहंदा के मेन रोड के बीच ले उत्ती मुड़ा म एक फरलांग म परथे। इहां नरमदा मइया बिराजमान हे। कुंड अउ बहुत अकन मंदिर घलो हे। इहां कुंवार अउ चइत नवरात म मनोकामना ज्योति जलाय जाथे। माघी पूरनिमा म दू दिन के मेला-मड़ई भराथे। दूरिहा-दूरिहा ले आय सरद्धालुमन नरमदा कुंड म डुबकी लगाथें। नरमदा मइया के दरसन करथें। मड़ई-मेला के मजा लेथें।
नरमदा मइया के जगा ह दरसनीय हे। ऐहा आस्था अउ भगती ले भरपूर घलो हे। गांव के सुरुच म एकठन पीपर के बड़ जुन्ना पेड़ हे। गांव म नदिया हे, जेन ह परोसी गांव किसना अउ सुरसूली ल जोरथे। नदिया ह ख रखरा नदिया ले बोहत बोहत आथे। इहां पांचवी तक स्कूल हे। गराम पंचायत घलो हे। गांव म दूठन पारा हे। दूनों पारा म आंगनबाड़ी हे।