बड़ सुग्घर हे कनकी ह

आवव मोर गांंव

कोरबा ले बीस किलोमीटर दूरिहा हसदो नदी के तीर म कथरीमाल कनकी गांव हे। इहां भुइंयाफोर भोलेनाथ बहुत पहिले के निकले हे। तब ले बछर म दू पइत सावन अउ महासिवरातरी म जोरदार मेला भराथे। चालीस किलोमीटर के आसपास के मनखेमन मेला घूमे अउ संकर भगवान म जल चढ़ाय बर आथें। कोनो कनकेस्वर त कोनो चकेस्वरधाम के नांव ले जानथें।
इहां के मंदिर ह पथरेच पथरा म बने हावय। दीवालमन म संकर-पारबती के बहुत अकन सुग्घर मूरति गढ़ाय हे! मंदिर के तीरेच म जुन्ना महमाई मंदिर घलो हे। चारोमुड़ा ले गांव ह रूखराई के जंगल म घेराय हावय! कोरबा एनटीपीसी के दर्री डेम वाला नहर घलो ह इहां ले नाहके हे, जेकर फायदा इहां के किसानमन रबी फसल लेके उठाथें। ए गांव के एकठन अउ भारी बिसेसता हे के इहां अबडक़न परवासी चिरईमन ह बछ्रर अपन डेरा जमाथें। गांव वालामन ऐकर रखवारी करथें। कोनो ल मारे बर नइ देवंय। सरकार घलो ए चिरईमन ल बचाय बर कतको जतन करथे।