मीठू – मैना के गोठ

नानकीन किस्सा

ब ड़े अस्पताल के पिछोत के पीपर पेड़ म मीठू-मैना डाक्टर-नर्स के आवाजाही ल टुकुर-टुकुर देखत राहे।
मैना ह मीठू ल पूछिस- संसार म सबले जादा सेवा भावना कोन म होथे?
मीठू- आज के समे म मोला कनो नइ दिखे। ए सुवारथ के दुनिया ए, मैना।
मैना- नइ मीठू, डाक्टरमन बहुत सेवा करथें। डाक्टरमन भगवान जइसे …।
मीठू- समे संग डाक्टरमन ह घलो बदल गे हें, मैना। डाक्टरमन घलो पइसा के गुलाम होगे हें।
मैना-अई … !
मीठू- तोला किस्सा सुनाथंव। किस्सा का, सच्ची घटना ए। एक डाक्टर ह अपन लखपति मरीज बर किडनी के परबंध करे खातिर अधरतिहा सहर म निकलगे।
मैना-अधरतिहा काबर?
मीठू-अधरतिहा कोन निकलथे?
मैना- चोर-चिलहाटमन। अउ कोन।
मीठू- ते तो जानथस। भिखारीमन रद्दा म कीरा-मकोड़ा कस सुते राहे। एक भिखारी ल बेहोसी के दवा सूंघा के अस्पताल ले अइस। आपरेसन करके भिखारी के किडनी ल निकाल के लखपति मरीज ल लगा दिस।
मैना- हाय रे दईया !
मीठू- भिखारी हउस म अइस त डाक्टर ल पूछिस- डाक्टर साहेब, मोला कोनो बीमारी नइये, मोला इहां कोन लानिस हेे? मोर पेट म पट्टी कइसे लगे हे जी? डाक्टर बोलिस- तैं रात म रद्दा म बेसुध परे़े रेहे। मोर सेवा भावना जागिस त इलाज करे बर ले आएंव। ए तो डाक्टर के धरम ए- डाक्टर ह मुसकात किहिस ।
मैना- भिखारी कुछु नइ बोलिस?
मीठू- भिखारी ह बनेच चिल्लइस- ‘मेहा भिखारी अंव। मोला कोनो बीमारी नइ रिहिस।Ó डाक्टर ह डांट के बोलिस- ‘डाक्टर तैं आस के मंय आंव रे? तोर बीमारी ल मेहा जानहूं।Ó भिखारी चिल्लात पुलिस थाना चले गे। जांच सुरू होगे। ‘चोर-चोर मउसेरे भाई।Ó जांच म डाक्टरमन अपराधी डाक्टर के समरथन करिस, अउ भिखारी ल पगला होगे हे कही दिस।
मैना- हे भगवान ! तोर दूसर रूप के कइसन चाल हे!