कामता के चितावर दाई
रायपुरPublished: Jan 10, 2020 04:06:15 pm
आवव मोर गांव
सि मगा ले उत्ती मुड़ा म छह किलोमीटर दूरिहा सड़क मारग म कामता गांव बसे हे। सिमगा, बलौदाबाजार ले कामता गांव आय-जाय बर मोटर, गाड़ी, बस आटो चलत रइथे। ए गांव ह बड़ सुग्घर हे। गांव के सड़क के थोरकिन दूरिहा म पान ठेला, किराना दुकान, साइकिल दुकान लाइनवार खुले हावय। इहां राम लीला, गराम पंचायत, इस्कूल भवन अउ चउपाल बने हे। जिहां गांव के छोटे-बड़े सबो जवंहरियामन सुख-दुख, मया-पीरित के गोठ बांटत रइथें।
कामता गांव के एक किलोमीटर दूरिहा नवागांव झिरिया के बीच म चितावर दाई के मंदिर हे। जिहां राधा-किसन, अर्धनरेस्वर, मावली भारभरी देवी, बम्लेस्वरी अउ कतकोन देवी-देवता के मंदिर बने हे। चितावर के खुसरती म सबले आगू मंदिर म चितावर दाई कुंड म बिराजमान हे। बसंत पंचमी अउ महासिवरातरी के पावन परब म मेला भराथे। चितावर दाई के दरस करे बर दूरिहा-दूरिहा ले मनखेमन आथें। जंगल झाड़ी, नरवा, फूल-फुलवारी के पुरवाही हवा के आनंद घलो मिलथे। चितावर म कतकोन दानदाता अउ समाज के भवन, मंदिर बने हावय। चितावर ल कामता गांव के नाव से जाने जाथे।