साल्हेवारा हे सुग्घर गांव

आवव मोर गांव

कवर्धा-खैरागढ़ राजमारग म बिराजे हे मां नरमदाकुंड (गंडई)। जिहां ले बुड़ती कोती 40 किलोमीटर दूरिहा म नांदगांव जिला के आखिरी छोर म डोंगरी अउ पहाड़ी के कोरा म बसे हे साल्हेवारा गांव ह। ए गांव के बाद म मध्यपरदेस के सीमा सुरू होथे। इहां ले 60 किलोमीटर दूरिहा म परसिद्ध कान्हा केसली रास्ट्रीय उद्यान हे।
नरमदा ले सुरू होके सफर के आधा मारग म मैकाल स्रेनी परबत के तीरे-तीरे डोमी सांप कस लहरावत घाटी चघथे। साल्हेवारा पहुंचे के 7 किलोमीटर पहली मारग म नदिया तीर बिराजे हे बंजारी दाई ह। जंगल छेत्र म बसे के बाद घलो साल्हेवारा म आधुनिक जीवन बर जरूरी कतको सुविधा उपलब्ध हावय। जइसे यातायात, बिस्राम गृह, पुलिस थाना, बैंक एटीएम, अस्पताल, दूरसंचार, इस्कूल, कालेज, मंडी, बड़े-बड़े दुकान, होटल, भोजनालय गांव के सोभा बढ़ावत हे।
गांव के तीर-तखार म डोंगरी भीतरी छोटे-छोटे अब्बड़कन दरसनीय जगा हे। जेमा कंसेला पहाड़ी के दुरगा मंदिर, घास कुआं, झरना (कोपरो), ठाड़ पानी झ्ररना, केरापानी उद्गम कुंड आदि परसिद्ध हे।