काबर बाढ़थे हिन्दू महीना

हमर संस्करीति

By: Gulal Verma

Published: 16 Sep 2020, 04:47 PM IST

एसो कुंवार महीना के नवरात ह एक महीना आगू घुंच गे हावय। पंडितमन पंचांग देख के बताइस कि दूठन कुंवार हे अउ दूसरइया कुवांर म नवरात मनाय जही।
पहिली कुंवार महीना ल मलमास, खरमास, अधिक मास नइते पुरुषोत्तम मास कहे जाथय। कोनो- कोनो डहर लौंग बाढ़े हवय कहे जाथय। ये महीना म सुभ काम जइसे- बर बिहाव, नवा दुकान खोलई, नवाघर बनई, सोना-चांदी बिसई मना करे जाथे। बताय जाथय कि हिन्दू पंचांग के जनम ह वैदिककाल म हो गे रिहिस। सूरुज देव ल जगत के आत्मा मान के काल के गिनती करे गिस। सूरुज अउ चंदा के दूरी, ठउर, गति के गिनती करके दिन, रात, बिहनिया अउ संझा बनाय गिस। एक बछर ल बारा महीना अउ एक हफ्ता ल सात दिन म बांटे गिस। ऐमा पांचठन बात तिथि, वार, नछत्र, योग, करन के धियान रखे गिस। तुलसीदास ह रामचरित मानस म राम जनम के बेरा म इही पांचों के बरनन करे हे। 'जोग लगन ग्रह बार तिथि सकल भ अनुकूल।Ó
वसिस्ठ सिद्धांत म बताय अनुसार हमर हिन्दू कैलेन्डर हा सूरुज महीना अउ चन्दा महीना के गिनती ले चलथे। वोकरे सेती बाढ़े खरमास ल चंदा मही कहे गे हे। वेद म बताय हे कि सौर बछर म 365 दिन 15 घटी 31 पल 30 विपल होथे अउ चन्दा बछर म 354 दिन 22 घटी 1 पल 23 विपल होथे। एक बछर म इंकर दूनों के अंतर 10 दिन 53 घटी 30 पल 7 विपल हो जाथे, जौन तीन बछर म एक महीना बन जाथे। ऐकरे सेती हर तीन बछर म एक चंदा महीना आगर हो जाथे। वो बछर बारा के जगा तेरा बछर हो जाथे।
तेरवां महीना ल सूरुज बछर अउ चंदा बछर के अंतर ल बरोबर करेबर बनाय गे हवय। हर तीन बछर म एक महीना बाढ़थे। वोकरो महीना ल फागुन ले कातिक महीना के बीच म रखे गे हावय। अंगरेजी कलेंडर म फरवरी महीना ह हर चार बछर म ओनतीस दिन के हो जाथय। काबर कि एक बछर ह 365 दिन अउ 6 घंटा के होथे। जउन चार बछर म 24 घंटा माने एक दिन हो जाथे। तब ऐला बरोबर करे बर फरवरी ल 29 दिन करे गिस।
नवा महीना बनाय के पाछू कथा हावय। भगवान बिसनु ह नरसिंग अवतार लेके इही महीना म हिरन्यकस्यप के वध करे रिहिस। अइसने द्वापर म भीस्म के मरनी के कथा घलो मल मास ले जुड़े हवय। भगवान ह ऐकरे सेती एक महीना बढ़ाय रिहिस। बिग्यानिकमन के ग्रहगति अउ धारमिक मानता ले हर तीन बछर म एक महीना बाढ़ जथे।

Gulal Verma Desk
और पढ़े
हमारी वेबसाइट पर कंटेंट का प्रयोग जारी रखकर आप हमारी गोपनीयता नीति और कूकीज नीति से सहमत होते हैं।
OK
Ad Block is Banned