नइ बने हे खूबचंद के सपना के छत्तीसगढ़

पुन्यतिथि

By: Gulal Verma

Updated: 21 Feb 2021, 04:49 PM IST

अवइया समे के समसिया ल जान लेवइया महापुरुस डॉ. खूबचंद बघेल के सपना अधूरा हे। छत्तीसगढ़ राज बन गे हे, फेर भासा अउ संस्करीति के काम बांचे हे। छत्तीसगढ़ी राजभासा म हलवी भतरी घलो समाय हे। फेर, आदिवासी, दलित, पिछड़ामन के जादा पुछारी नइये। अइसन म राजे बने भर ले कुछू नइ होवय। जब डाक्टर साहब के सपना के छत्तीसगढ़ बनही तभे उंकरो कलयान होही। जउनमन सदा दिन लात खइन। भरपेट न भात पइन न उंचा पिड़हा। जब उंकर दिन बहुरही तभे जाके माने जाही के बनगे डाक्टर खूबचंद बघेल के छत्तीसगढ़़ राज।
डॉ. खूबचंद बघेल ह सुग्घर छत्तीसगढ़ के सपना देखत 69 बछर के उमर म परलोक सिधार गे। वोकर जाय के 31 बछर बाद छत्तीसगढ़ राज बनिस। फेर, वोकर सपना के छत्तीसगढ़ अभु घलो नइ बने हे। 19 जुलाई 1900 म रइपुर जिला के पथरी गांव म किसान जुड़ावन बघेल के घर खूबचंद ह जनम लीस। डाक्टरी के पढ़ई करइया कुरमी समाज के पहिली डिगरीधारी रहिस। डाक्टरी पढ़ के धन नइ कमइस, देस सेवा म भिडग़े। अजादी के बाद देस के लोगन के सेवा के काम ल हाथ म लीस। धीरे-धीरे डाक्टर बघेल ल लागिस के अतेक बड़ देस म सब परांत के लोगन के अपन ताकत हे, फेर छत्तीसगढिय़ामन के पुछारी नइये। चारों मुड़ा के लोगन आके छत्तीसगढ़ म बसत जात हें अउ छत्तीसगढिय़ामन ल उजारत जात हे। उनकर देखइया कोनो नइये।
सरकारी नउकरी म छत्तीसगढिय़ामन बर जगा नइ राहय। 1956 म भेलई कारखाना छत्तीसगढ़ म लगिस। वोकर बर सैकड़ों गांव के जमीन सरकार ह ले लीस, फेर नउकरी म बाहरी मनखे के कब्जा जादा होय लगिस। त मिनी माता अउ खूबचंद बघेल जइसे नेतामन ल गजब दुख लागिस। 28 फरवरी 1956 के छत्तीसगढ़ी महासभा के गठन होइस। महासभा म डाक्टर बघेल अध्यक्छ बनके गरजिस। कहिस- ‘छत्तीसगढ़ आजो कतेक गरीब हे जतेक गुलामी के समे म रहिस। हमर भासा के कोनो साहित्य अउ इतिहास नइये। छत्तीसगढिय़ामन दूसर परांत ले आए भाईमन सो निरादर पाथें। का हमर कोनो योग्यता नइये। काय सेती हे के छत्तीसगढिय़ामन ल सब ***** समझथें।’ डॉक्टर साहब 1956 ले सरलग छत्तीसगढ़ी महासभा के संगठन चलइस अउ छत्तीसगढिय़ामन बर लडि़स। 196७ म छत्तीसगढ़ भातृ संघ बनइस। नवा पीढ़ी ल आगू लाने के उदिम करिन। 22 फरवरी १९६९ के दिल्ली म उनकर निधन होगे।

Gulal Verma Desk
और पढ़े
हमारी वेबसाइट पर कंटेंट का प्रयोग जारी रखकर आप हमारी गोपनीयता नीति और कूकीज नीति से सहमत होते हैं।
OK
Ad Block is Banned