सावन म बेलपाना के महिमा

संस्करीति

अइसे तो सबो जानत हे बेलपाना ह हिन्दू धरम मनइयामन बर कतका महत्तम रखथे। भगवान भोलेनाथ ल एक डारा बेलपाना चढ़ा के मनमाफी वरदान पा सकत हन। कथा म बताय हवय कि जंगल म भुलाय भील सिकारी ह रतिहा बिताय बर पेड़ म चढग़े। वोकर बिन जाने रात भर बेलपाना ह टूट के गिरत रहिस। भगवान भोलेनाथ ह मोर भगत ह बेलपान चढ़ाय हे कहिके असीस धन सम्पति अउ भगती दे देइस। कहे जाथे सावन म सिव ल बेलपत्र चढ़ाय ले तीन जुग के पाप के नास हो जाथे।
अइसे तो आधा ले जादा पुरान म बेल के महिमा बताय जाथे, फेर बेल के जनम ल स्कंधपुरान म बताय हवय। एक घाव पारबती माता ह अपन माथा के पछीना ल पोंछ के फेंकिस। वोकर दू -चार बूंद ह मंदार पहारी म गिरगे। उही ह बेल पेड़ बन गे। कहे जाथे कि बेल के जर म गिरिजा,पेड़ोरा म महेस्वरी, डंगाली म दक्छदायनी, पाना म पारबती, फूल म गौरी अउ फर म कात्यायनी के रूप माने गे हे। ऐकर कांटा म कतको सक्ति माने गे हे। ऐकरे सेती सिवजी ह बेलपत्र चढ़ाय ले खुस होके असीस अउ बरदान देथे। महालक्छमी के रहवास घलो बेल पेड़ म माने जाथे। बेलपान के महत्तम ल सिव पुरान म जादा बिस्तार करके बताय हवय।