नगरगांव के चारों कोती हावय देवताधामी

आवव मोर गांव

नगरगांव ह मांढर अउ सिलयारी रेलवे स्टेसन के बीच म बसे हे। गांव के उत्ती म बोहरही दाई हे। तेकर कोरा म कोल्हान बोहवत हे। भंडार म मारोदेव. बुड़ती म ठाकुर देव, रक्सहूं म सीतला माई अउ बीच बस्ती म महामाई दाई बिराजे हे। चारों कोती तरिया डबरी अउ कुआं के भंडार हाबय। फेर, फेक्टरी के धुगिंया ह मनखे के चोला अउ माटी ल मता के रख देहे। का तरिया, का नरवा, का डबरी सबो ह अपन अतीते बचाय बर रोवत हे।
मनखेमन के हिरदे ह सकला गे हे। काही नइ बांचत हे। भाठा, भररी, दइहान ल सुवारथी मनखे छेक डरे हें। अब कोनो माटी के काम करइया मनखे खोजे ले नइ मिलय। फेर मोला बिकट सुरता आथे।
सोरियावत रहिथंव कभु तो मोर गांव ह पहिली जइसे हो जतिस। सबो मनखे एक-दूसर के मया म खो जतिस। गांव म रहइया सबो समाज के मनखेमन एक होके सुग्घर बिकास के रद्दा ल गढ़तिस। तभे तो हमर गांव ह पहिली के नगरगांव असन लागतिस।