धूमनाथ मंदिर हे सरगांव म

आवव मोर गांव

बिलासपुर- रायपुर रास्टरीय राजमारम म मुंगेली जिला म हावय सरगांव ह। बिलासपुर लेे 26. 8 किलोमीटर परथे। सरगांव ह धूमनाथ मंदिर के खातिर परसिद्ध हे। ये मंदिर ह कल्चुरी राजामन के समे के बने आय। धूमनाथ भगवान भोलेनाथ ल माने जाथे। फेर, ऐमा भोलेनाथ के चित्र या मूरति कुछु नइये। मंदिर उत्तीमुखी हे अउ पंचरथ सैली म बने हे।
राज्य सासन डहर लेे संरक्छित स्मारकमन के सूची म 41वां नंबर म धूमनाथ के नाव घलो हावय। धूमनाथ मंदिर के गरभगिरिह म सेंदुर पोताये जीभ निकाले देवी के मूरति बिराजे हे। जेकर सेती ऐला धूमेस्वरी देवी कहिथें। मंदिर के बाहरी भाग म नरसिंह अउ गनेस के संग-संग अब्बड़ अकन चित्र बने हावय। चइत अउ कुंवार के नवरात म इहां जोत जलथे। धूमेस्वरी मंदिर ह सरगांव के बस्ती भीतर हे। धूमेस्वर मंदिर ले थोकिन दूरिहा म महमाया मंदिर हे। मंदिर के तीर नवदुरगा के नौ रूप अउ एकठन बडक़ा सिवलिंग स्थापित हे। मंदिर के पहिली मंजि़ल म पंचमुखी अउ भंडारमुखी हनुमान एकेठन मंदिर म बिराजे हें। एकठन मंदिर म भगवान राम, सीता माता अउ लछमनजी हे।