छत्तीसगढिऩ बेटी के बुलेट सवारी

समाज

आरुग छत्तीसगढ़ी सवांगा पहिरे प्रभा ठाकुर जब 500बब के बुलेट मोटर साइकिल म चढ़ के दूनों हाथ ल छोड़ के पल्ला कुदाथे त देखनी हो जाथे। अतकेच भर नइ, वोहा ऐकर संगे-संग 1942 के विलीज माडल जीप म घलो स्टंट करई ल भाथे। संग म तौरई, दौड़ई अउ जम्मो आने खेल अउ कला प्रतिभा के घलो जौहर देखाथे।
दुरुग जिला के धमधा तहसील के गांव टठिया के ददा बिरेंद्र बहादुर सिंह राजपूत अउ महतारी चमेली सिंह राजपूत के घर 25 जून 1967 के जनम धरइया प्रभा ठाकुर एक एथलीट के रूप म अब तक 25 ले जादा रास्टरीय स्तर के खेल प्रतियोगितामन म भाग ले डारे हें। ऐकरे छोड़े स्थानीय स्तर के कतकों रचनात्मक उदिममन म उन संघरते रहिथें। उंकर यूट्यूब वीडियो के 17 लाख ले जादा व्युव्स हे।
उंकर सियान भिलाई इस्पात संयंत्र म अधिकारी रिहिन हें, तेकर सेती उंकर पढ़ई-लिखई घलो भिलाई म ही होइस। गल्र्स हायर सेकंडरी स्कूल सेक्टर 2 ले उन हायर सेकंडरी पास करे के पाछू कल्यान महाविद्यालय भिलाई ले हिन्दी साहित्य म एमए करिन।
छात्र जीवन ले ही उंकर एथलीट के रूप म जबर जुड़ाव रेहे हे। ऐकरे सेती 1984 म इंडियन पंजा कुस्ती (40 किग्रा) म रास्टरीय रैंक 1, 1986 म 21 किमी पूरा अंतररास्टरीय मैराथन म अंतररास्टरीय रैंक 5वां, 1989 म 21 किमी दिल्ली अंतररास्टरीय मैराथन म अंतररास्टरीय रैंक 2, 1985 म पावर लिफ्टिंग म रास्टरीय रैंक छठवां, 1985 अउ 1987 म दिल्ली म गनतंत्र दिवस परेड म घलो भागीदारी निभाइन। 1987 म दिल्ली म दिवस परेड म 3 किमी मैराथन म रास्टरीय रैंक दूसरा स्थान पाइन।
प्रभा जी एक भेंट म बताइन के खेल के संग-संग कला डहर घलो उंकर झुकाव रिहिस हे। कक्छा 11वीं तक उन सितार वादन के कोर्स करे हें। ऐकर संगे-संग स्कूल म होवइया सामूहिक गीत अउ नृत्य के कारयकरममन म घलो बढ़-चढ़ के हिस्सा लेवंय। उन बताइन, अभी रायपुर के फिलिम बनइया जसबीर कोमल के एक फिलिम ‘मोला उहिच टूरी चाहिए बात खत्म’ म चरित्र अभिनेत्री के रोल करत एक अपहृत होवइया लडक़ी ल बचाए के भूमिका निभाही। जेमा उन फाइट करत नजर आहीं। आज 54 बछर के उमर म घलो उंकर कला अउ जम्मो खेलमन बर लगन ल देख के गजब खुसी होथे।