जजमानी परथा नदावत हे

हमरसंस्करीति

दु नियाभर म कोनो जिनिस के बिसई-बेचई अउ काम-बूता (सेवा) लेवई खातिर रुपिया-पइसा के चलन हे। फेर, छत्तीसगढ़ समेत हमर देस के गांव-गंवई म जुन्ना समे ले जजमानी परथा चले आवत हे। पहिली काम (करम) के मुताबिक वरन बेवस्था रहिस। वइसने सबो जिनिस अउ सेवा लेवई-देवई खातिर जजमानी बेवस्था रहिस हे।
जजमानी बेवस्था म एक गांव या एक ले जादा गांव के सबो जात के लोगनमन जिनिस या चीजमन (वस्तुओं) अउ काम-बुतामन (सेवाओं) के सेती एक-दूसर ले जुड़े रहिथें। बड़का ले बड़का काम अउ संस्कार ह बिना कोनो परेसानी अउ पइसा-कउड़ी के कमी के हो जथे। जइसे के – कोनो परवार के घर म नोनी के बिहाव हे त सबो घर ले अपन-अपन सामरथ के मुताबिक वोकर घर चाउर-दार, साग-भाजी पहुंचाय जाथे। जेकर-जेकर घर दूध होथे, वोमन थोर-थोर दूध बचा के वोकर घर पहुंचाथे। समरथ के मुताबिक रुपिया-पइसा, कपड़ा-लपता, गहना-गोदर, बरतन-भाड़ा घलो देय जाथे। जइसे के गांव के कुम्हार ह माटी के बरतन-भाड़ा, लोहार ह लोहा के बरतन, दरजी ह कपड़ा, राउत ह पानी भरे के काम, बाम्हन ह बिहाव कराय के धारमिक काम, नाऊ ह पूजा के सामान सकेले, पत्ता-दोना बना के देय के काम करके सहयोग करथें।
नोनी के ददा ह मिले जिनिस अउ सेवामन के बदला म देवइइमन के घर म बिहाव के समे या फेर अउ दूसर सामाजिक कारयकरम म वोमन ल अपन छमता के मुताबिक कम या जादा मातरा म वापिस करथे। जेन ल हमर देस के उत्ती डहर ‘बेवहारÓ नांव से जाने जाथे अउ जेन जिनिस ल वापिस करे जाथे वोला ‘नेंगÓ कहे जाथे। सबो जात-बिरादरी म ए अनूठा संबंध अउ जिनिस अउ सेवा (काम-बुता) ल देवई-देवई ह कोनो भी बिसेस अवसर, समारोह म सरलग चलत रहिथे।
जजमानी परथा के कतकोन लाभ हे। जइसे के- काम-बुता के सुरक्छा, रुपिया-पइसा के सुरक्छा, मजबूत अउ बिस्वसनीय सामाजिक संबंध, सांति अउ सादा-सरवदा जिनगी जियई, कुछु चीज के चिंता-फिकर नइ, अइसने अउ अब्बड़ अकन।
महारास्टर म ‘बरा-बतूतेÓ, तमिलनाडु म ‘मिरासीÓ, करनाटक म ‘अदादेÓ अउ छत्तीसगढ़ समेत उत्तर अउ मध्य भारत म ‘जजमानीÓ बेवस्था कहे जाथे। आजकाल आधुनिक अउ पास्चात्य संस्करीति के परभाव के सेती ए परथा ह नदावत जावत हे। जउन ह हमर सामाजिक अउ आरथिक बेवस्था बर बड़ दुख अउ चिंता-फिकर के बात ए।