पौधरोपन बर हमन ल झन चुनंय!

गोठ के तीर

आज बड़ बिहनिया ले नरसरी म जम्मो फूल अउ बड़का रूख के नान्हे-नान्हे पौधामन म खुसी के लहर दउड़त हवय। काबर के आज पौधारोपन कारयकरम म नरसरी के जम्मो फूल अउ बड़का रूखमन के नान्हे- नान्हे पौधा ल लेय बर बड़का जनिक टरक ह नरसरी म आये हवय।
गोंदा, मोंगरा, गुलाब फूल अउ चंदन के नानकुन पौधामन आपस म गोठियावत रहिन। गोंदा ह काहत रहिस- अवो बहिनीमन ए पौधारोपन का जिनिस होथे? मेहा तो कभु नइ देखे हंव। ये नरसरी के बाहिर के दुनिया ल देखेबर अब्बड़ बेचेन हंव।
वोकर गोठ ल सुन के गुलाब ह बोलिस- पौधारोपन म हमन ल ए नरसरी ले दूसर ठउर म लेंगही। हमन ल उहां कियारी नइ त मइदा म बड़का गड्डा खोद के जगाय जाही। अब्बड़ मनखेमन के भीड़ ह सकलाय रहिथे। काा नेता, का वीआईपी, का गरीब, का अमीर, इस्कूल के लइका पिचका, मास्टर जम्मो सकलाय रहिथें। बड़ मजा आही। बाहिर के दुनिया ल देखे बर आंखी ह तरस गे हवय।
उही बेरा चंदन रूख के नानकुन पौधा ह मुच-मुंचावत कहिस- अब्बड़ मजा आही इही पौधारोपन के कारयकरम म।
जम्मो नान्हे फूल अउ नान्हे रूख के पौधामन के गोठ ल सुन के आंवरा रूख के नान्हे पौधा ह बोलिस- अवो फूल के नानकुन रोपेे पौधा अउ चंदन रूख क नान्हे पौधा, तुमन जानथव के पौधारोपन का ए? भइगे सैकड़ा-सैकड़ा म फूल अउ बड़का रूख के पौधामन ह बछर पौधारोपन के नांव म ठगा जावत हवंय। काबर ह बछर बड़का- बड़का पौधारोपन कारयकरम के आयोजन होथे। फेर, बड़का नेता, वीआईपीमन के हाथ ले तोर रोपन होगे त बने बनही। तोर पूरा देखभाल, पानी, सुरक्छा जम्मो होही। नइ त अउ फेर कोनो आम लोगनमन के हाथ ले रोपे गे, त भइगे एके दिन म मुरझा जाबे अउ दूसरइया दिन तोर मरे बिहान होही। तंय ह मर जाबे।
आंवरा रूख के नान्हे पौधा ह लंबा सांस लेवत कहिस- ऐकर ले त हमन इही नरसरी म अब्बड़े खुस म हवन। इहां पानी, खातू, जम्मो सुरक्छा, हमर जतन के इंतजाम हव। इहां हमन अब्बड़े खुस म हन। अब्बड़े सुग्घर दिखत हवन। भगवानझन करे हमन ले कोनो पौधा ल पौधारोपन बर चुनई करय। नइ त हमर जम्मोझन के मरे बिहान हो जाही।