सरकार डहर टकटकी लगा के देखे के समे!

का-कहिबे…

जब ले चुनई के परिनाम आए हे, तब ले कतकोनझन सदमा म हावंय। न ऐमन ‘फूल छापÓ वाले पारटी के ए, न ‘हाथ छापÓ वाले पारटी के ए, न अउ कोनो दूसर पारटी के ए। ऐमन तो बस आम जनता ए। फेर, ऐमन ल सदमा लगे के कारन हे ‘हाथ छापÓ के एकतरफा जीत। वोमन ‘हाथ छापÓ के जीते ले दुख नइये। ऐकरमन मानना हे के सरकार कोनो पारटी हो होवय, जनता के हित अउ परदेस के बिकास होय बर चाही, बस।
दरअसल म ऐहा खुसी के सदमा ए। खुसी ऐकर सेती के किसानमन के आंदोलन के बाद अइसे नेता दिखई दिस जउनमन किसानमन के करजा ल दस दिन म माफ करे के बात कहिंन। तेकरे सेती लगथे के पहिली पइत छत्तीसगढिय़ामन एकमत होगिंन। वोमन ल बिसवास हे के नवा सरकार ह चुनई के पहिली करे अपन जम्मो वादा ल पूरा करही।
‘हाथ छापÓ वाले पारटी ह तो धान के कटोरा छत्तीसगढ़ के माटीपुत्र, अन्नदाता किसानमन के पीरा ल दूरिहा करे के बीड़ा उठइस अउ एकतरफा जीत गे। ‘फूल छापÓ वालेमन घलो सदमा म हें। वोमन ऐकर सेती सदमा म हावंय के ‘हाथ छापÓ वाले पारटी ह छत्तीसगढ़, मध्यपरदेस अउ राजस्थान विधानसभा के चुनई म जीत गे त फेर कहुं लोकसभा चुनई म घलो झन जीत जाय।
सच बात तो ए आय के जेन पांचठिन परदेसमन म चुनई होइस, उहां सबो राजनीतिक पारटी ह लइका, सियान, जवान, किसान सबो बर अब्बड़ वादे करे हें। वादा करे के रिवाज न नवा नोहय। सबो पारटी जवान-किसानमन से वादा करथें। काबर के जवान के भरोसे राजनीति अउ किसान के भरोसे परदेस चलथे। जवनहा कारयकरतामन जी-जान लगाके मेहनत करथें, तभे राजनीतिक पारटीमन के काम-बुता चलथे।
फेर, सुवाल हे के का कोनो पारटी चुनई जीते अउ सरकार बनाय के बाद जवनहा अउ किसनहामन ल सुरता रखथे? अउ कहुं सुरता करथे त कतेक सुरता करथे, कइसे सुरता करथे? का हमर देस म कोनो भी परदेस आज जवनहा अउ किसनहामन बर आदर्स हे? का कोनो भी राजनीतिक पारटी जवनहा अउ किसनहामन बर आदर्स कहे जा सकथे? आज के जवान-किसानमन तीर अब्बड़ सुवाल हें।
अइसन म जेन परदेसमन म नवा सरकार बने हे, वो सरकारमन ल जवान-किसानमन उप्पर जादा ले जादा धियान देय बर चाही। जवान-किसानमन के नौकरी-चाकरी, रोजगार-धंधा, काम-बुता, आमदनी ल निस्चित करे बर चाही। अइसे नइ होय ले, देस-परदेस के सांति ल खतरा पइदा हो सकत हे। समाज ल गरहन लग सकत हे। जइसे चुनई जीते खातिर राजनीतिक पारटीमन के नजर जवनहा अउ किसनहामन ऊपर टिके रिहिस, वोइसनेच सरकार बनइया पारटी अउ वोकर नेतामन ऊपर अब जवनहा अउ किसनहामन के नजर टिक गे हे।
कतकोन बछर ले राजनीतिक पारटीमन गरीबी मिटाय, बने दिन लाय जइसे कतकोन वादा करत आवत हें। फेर, गरीब जनता, किसान, बेरोजगारमन के दिन नइ बहुरत हे। वोकरमन के बने दिन नइ आवत हे। गरीबी के बदला म गरीबमन मेटावत जावत हें, त अउ का- कहिबे।