सोसल मीडिया बनत हे अभिसाप

संचार माध्यम के का फाइदा, का नुकसान

अति सब जघा बरजित हे। फेर आज के बेरा म जेन तरीका ले जवनहामन सोसल मीडिया म बइहाय हें, चिंता के बिसय ए। आज के बैग्यानिक जुग म इंटरनेट जिनगी के जरूरत बन गे हे। फेर, ऐकर ले नैतिकता, पबरितता अउ ब्यवहारिकता म गिरावट घलो आय हे। सोसल मीडिया के सेती रिस्ता-नता के डोरी टूटत जावत हे। सोसल मीडिया म फेसबुक, ट्विटर अउ वाट्सअप ले कोनो नइ बाचे हे। का लइका, का जवनहा, का डोकरा, का संत-महात्मा, का मंतरी, का गुरुजी कोनो नइये जेन ह सोसल मीडिया के परयोग नइ करत होहीं। फेर, अतेक उपयोग जेकर ले घर- दुवार, सगा-संबंधी, परवार, संगी – मितान सबला छोड़ देवई ह बड़ चिंता करे के गोठ ए। सोसल मीडया के दिनभर परयोग ह बीमारी कस होगे हे। जेकर दवई सिरिफ संयम हे।
बिना संयम के सोसल मीडिया ह तनाव अउ लड़ई-झगरा पइदा करथे। जेन तकनीक ह हमन ल दुनिया ले जोड़त हे, उही ह हमन ल अपन ले अलग घलो करत हे। आपत्तिवाला फोटो, वीडियो अउ बयानबाजी ले कई पइत देस म संपरदायिकता तनाव पइदा हो गे हे। अइसन म सोसल मीडिया के दुरुपयोग ल रोकई ह जरूरी होगे हे।
मोबाइल के तो जवाब नइये!
आ ज के आधुनिक जुग ह डिजिटल के हे। हर मनखे ल मोबाइल के जरूरत हो गे हे। मोबाइल सबे के पहुंच म होगे हे। मोबाइल ह लोगनमन ले अतेक जुड़ गे हे के ऐकर बिना समे गुजारन कठिन हो जाथे। मनखेमन मोबाइल म दिन -रात खुसरे रहिथें। कोनो गोठियाय बर त कोनो नेट खातिर। फेसबुक अउ वाट्सअप के अतेक वायरस लोगन तक फइल गे हे के वोमन सुख-दु:ख के सब्बो गोठ ल उही म गोठिया डरथें।
सेल्फी बर घलो मोबाइल परसिद्ध होगे हे। मोबाइल ले एक ले सेक सेल्फी लेके लोगनमन दूसर ल भेज देथें। कहुं मोबाइल ह घर म छुट गे त लोगन ल मानो अइसे लागथे के वोकर परान ह छुट गे। वोकरे बर कहिथे, वाह रे मोबाइल तोर कोनो जवाब नइये। मोबाइल म बनेच सुभीता हो गे हे। नेट, सेल्फी ले लेके टीबी घलो आ गे हे। लोगनमन ल तीर म घलो लावत हे मोबाइल ह। मोबाइल के सही उपयोग करे ले फाइदेच-फाइदा हे। फेर, ऐकर अब्बड़ दुरुपयोग घलो होवत हे। अपराध, बुरई, बदनामी अउ ठगी करे खातिर मोबाइल के सहारा लेवत हें। गलत-सलत जानकारी घलो देवत हें।