सरकारी भासा

नानकीन किस्सा

मी ठू अपन मैना ल कहूं छोड़के उड़त-उड़त अइस अउ सरकारी आफिस के बाहिर म गुलमोहर के पेड़ म बइठ गे। मैना असकटात बइठे रहिस। बनेच बेर म मैना अइस अउमीठू के पीठ म चोंच फेरत पूछिस- ए मनखे ह गांव के किसान कस दिखथे। इहां काबर आ हे? मीठू- सच्ची केहे मैना, ऐहा गांव के किसान ए। एकठन कागद म साहेब के दसखत कराय बर बइठे हे, बपरा ह। मैना- साहेब ह आफिस म नइये का?मीठू- साहेब ह आफिस म अइस अउ हाजरी लगाके चल दीस । मैना- इहांं के साहेब ल तो मेहा बजार म घूमत देखे रहेंव।
मीठूू- साहेबमन घूमथे तेला घूमई नइ काहय, मैना। सरकारी भासा म Óबिजिट करथेÓ कहिथे, ‘इंस्पेक्सन म निकल हेÓ कहिथे। मैना- हूं ..। मीठू- मैना, देख साहेब आवत हे। बिचारा किसान के कागद म दसखत करही। मैना- कहां करत हे, मीठू। साहेब पेपर पढ़े ल धर लीस। मीठू- मैना, साहेबमन पेपर पढ़थे तेला पेपर पढ़ई नइ कहय। ‘अपन बिभाग के जानकारी लेवत हेÓ कहिथे । मैना- ए साहेब बने नइये, मीठू। बिचारा किसान ल दिनभर होगे घूमावत हे। बपरा ह खेती-खार ल छोड़ के आय हे। उवत-ले-बूड़त होगे। मीठू, देख तो कागद म दसखत करे ल छोड़के साहेब ह संगवारी संग गप्पे मारत हे। मीठू- मैना, साहेबमन गप मारथें तेला गप मरई नइ कहंय। ऐला ‘मीटिंग करत हेÓ कहिथें। मैना- आगी लगे अइसन सरकारी भासा म। ए साहेब ह किच्चक ए । भईगे किसान बपरा के कागद म आज दसखत नइ करे। दिन बूड़े बर जावत हे। चल, हमन अपन खोंदरा म चली… ।