मरनी के मांदी

गोठ के तीर

हमर गांव म एकझन जवनहा मनखे दुरघटना म मरगे। वोहा हेलमेट नइ पहिरे रहिस तेकरे सेती वोकर बाई के चुरी उतर गे। दस दिन के बाद वोकर मरनी के मांदी खवाइस अउ अपन सुख- दुख साथी बने गांव भर ल बलाइस
अब हमर घर ए पारा, वोकर घर वो पारा अउ नेवता मिले रहाय घरोघर झारा झारा। मे सोचेंव- मांदी घर म रंग -रंग के खवाथे अउ पानी नइ मिले त भारी चुचराथे। त एक लोटा पानी ल धरेंव अउ सारटकट तरिया पार डहर ले रेगेंव। हड़बिड़-हड़बिड़ लकर-धकर जात रेहेंव। पिछवा जहू कहिके बने अघवात रेहेंव। अंधयारी म एकझन से टकरागेंव। देखथो ता पता चलिस महापरसाद उपर झपागेंव।
अब जय जोहार करे बर लोटा ल तरिया के पार म मढायेंव अउ दूनों हाथ ल जोरके बने सुगर माथ नवायेंव। वोहा कथे- कहां जात हस महा परसाद अतका हड़बडी़ म?
मेहा कहेंव- मांदी खाये बर जात हो देखतो कतना बजे हे तोर घडी़ म। अब वोला बिदा करके कहेव- चल अब मांदी कोती भागे। जइसे लोटा ल धरेंव,महिला कमांडोमन आ गे।
वोमन कथे- बहुत दिन के खोजत रेहेन। आज सपडाय़े। कुछ ले दे के इही करा निपटाबे ते केस ल आगू बढा़बे। मेहा सोचेंव- कहां सारटकट के चक्कर म धंस गेंव। बिना कुछु करे अलकरहा फंस गेंव। पंचायत म जाहूं त मोरे बेइज्जती हे। इही करा निपट लेथों इही मोर गति हे। त पांच सौ रुपिया देंव तब छुट्टी पायेंव। उही करा खड़े-खड़े कसम खांव के आज के बाद रातकिन लोटा धर के तरिया पार नइ आंव।
अब मांदी म पहुचेंव। सब मनमाने सरपट-सरपट झड़त हें। हमर अंतस के भितरी म, बंगा-बंग दीया बरत हे। मेहा कहेंव- पांच सौ रुपिया दे हंव। वोकर छुटत ले खांहु। भले सबले आखरी म घर जाहुं। गटागट खात रेहेंव अलकरहा चुचरागे। मुनगा के भोरहा म अंगरी चबागे। पानी ल देखथो त उहु गंवागे। खात-खात अचानक देख परेंव वोला। जेन अपन पति गंवाय हे। जेकर आतमा ल सांति कराय बर हमन ल बलाय हे।
मोला लागिस, वो सोचत होही के हे भगवान ए कइसे रित बना हे। अभी वोकर चिता के राख नइ जुड़ाय होही अउ घर म किसम-किसम के पकवान बना हे। ऐला कइसे खवाथें अउ लोगनमन कइसे खाथें। का मोर पीरा सिरिफ मुहीभर ल जनाथे।
मेहा सोचेंव- ए मरनी मांदी (मिरित्यु भोज) ह एक किसम के अभिसाप ए। जेकर घर म दुख-दरद अउ मातम हे। वो घर म मरनी मांदी खवई पाप हे। वोकर दुख ल देख के मेहा अपन पांच सौ रुपयिा ल भुलागंवे। घर आय के बेरा म कठलहा के आंसू चुचवागे।