राजभासा आयोग के बदलही भाग!

बिचार

नवा छत्तीसगढ़ राज बने के बाद इहां के भाखा, संस्करीति अउ जम्मो चिन्हारी के आरुग अउ अलग रूप दिखही अइसे भाखा, साहित्य अउ कला, संस्करीति संग जुड़े लोगन ल भारी भरोसा रिहिस हे। फेर, पहिली अउ वोकर पाछू के दूसरइया सरकार के कारज ल देख के ए भरोसा आंसू ढारे बर धर लिए रिहिस।
दूसरइया सरकार तो ‘छत्तीसगढ़ राजभासा आयोगÓ गठन कर के थोर-बहुत उछल-कूद घलो करे के उदिम करत रिहिस। फेर जउन भी पदाधिकारी बनिन- बइठिन वोमन थथमराय बरोबर रेहे राहंय। चापलूसी करइयामन गद्गद् रिहिंन। जेमन सही म भाखा, साहित्य, संस्करीति बर मरथें-खपथें तेकरमन के हिरदे भाखा के होवत करलई अउ दुरगति ल देख के कलप डारंय।
अब नवा सरकार सपथगरहन कर के बिराजमान होगे हवय। त लोगन ल भरोसा होवत हावय के अब दूसर बिभाग के जइसे भाग बदले के उम्मीद दिखत हे ठउका वइसने भाखा, साहित्य, संस्करीति अउ इहां के इतिहास ले जुड़े बिभागमन के भाग घलो बहुरही। हमर अस्मिता के छापा जग-जग ले उज्जर अउ सुग्घर दिखही।
वइसे भी नवा मुख्यमंंतरी भूपेस बघेल ह आरुग छत्तीसगढिय़ा अउ किसान के बेटा आय। अउ, एकरो ले जादा वोहा खुद छत्तीसगढ़ राज आन्दोलन संग जुड़े रिहिन हें। वोकर अगुवाई करत रिहिन हें। तेकर सेती राज आन्दोलन ले जुड़े जम्मो किसम के भावना अउ मांग ल वोहा बने से जानत हें। इही पाय के उंकर ले उम्मीद घलो जादा जाग गे हवय के वोहा हमर भाखा, संस्करीति अउ जम्मो अस्मिता के गौरव ल बढ़ाहीं। भाखा अउ संस्करीति के छेत्र म चापलूसी अउ दलाली के खेल खेलइयामन के सडयंत्र जाल ले ऐला उबारहीं। सही मायने म अलग राज बने के सपना ल साकार करहीं। हमर पुरखामन जेन उद्देस्य ल लेके अलग राज के सपना देखिन, वोकर खातिर आन्दोलन चलाइन, वोला पूरा करहीं।
जय छत्तीसगढ़, जय छत्तीसगढ़ी,
जय छत्तीसगढिय़ा।