बड़ सुग्घर हे तुमड़ीबोड़ ह

आवव मोर गांंव

राजनांदगांव ले बुड़ती डहर पंदरा किलोमीटर दूरिहा म रास्टरीय राजमारग ले लगे हवय तुमड़ीबोड़ गांव ह। गांव म सबो किसम के दुकान हे। तेकर सेती इहां आस-परोस समेत अउ दूरिहा-दूरिहा गांव के लोगनमन आथें। गांव म गरामीन बइंक, सुसाइटी, पटवारी, आरआई आफिस, पोस्ट आफिस, बिजली आफिस, लकड़ी डिपो, बारहवीं तक इस्कूल, सरकारी अस्पताल, पराथमिक स्वास्थ्य केंदर, पुलिस चौकी जइसे सुविधा घलो हे।
बछरभर इहां किसम-किसम के धारमिक कारयकरम, तीज-तिहार अउ मड़ई-मेला होथे। इहां के रामायन परतियोगिता परसिद्ध हे। गांवभर मिलजुर के रामसत्ता मनाथें। गांव म गुरुद्वारा, हनुमान मंदिर, संतोसी मंदिर, राम मंदिर, सिव मंदिर, सीतला मंदिर, सनि मंंदिर, नागबाहरा म भैंसासूर, सदबहिनी घूमियार चौरा, गौरा चौरा, रविदास मंदिर, जैतखाम, मदरसा, मजार अउ इसलामिया कमेटी घलो हे। तुमड़ीबोड़ होके बमलई डोंगरगढ़, गढ़माता, पास्र्वनाथ जैन मंदिर, ओसिया धाम, परयटन स्थल ओड़ार बांध जाय जाथे। तुमड़ीबोड़ गांव ह बड़ सुग्घर हे। लोगनमन ल एक पइत जरूर आय बर चाही। इहां के मनखेमन पहुना ल देवता जइसे मानथें। वोकरमन के भरपूर मान-गउन करथें।