जेमन सरग चलदिन वोकरमन के जिनगी ले सबक लेवव

का- कहिबे

मितान! नान-नान रहेंन त बड़ सुग्घर किस्सा-कहिनी सुने बर मिलय। ककादाई, ममादाई होवय या फेर बबामन, एक ले सेक बोध कथा सुनाय। अउ किस्सा के आखिर म काहंय- जिनगी म कभु गलत काम (लालच, छल-कपट, बैर, चोरी, लबारी, बेईमानी, जलनखोरी, धोखाधड़ी, घमंड) नइ करे बर चाही। ये किस्सा कस गलत काम के गलत फर मिलथे। जइसे करनी-वइसे भरनी। पंचतंत्र के किस्सा-कहिनी घलो हमन ल जिनगी म गलत काम नइ करे के सीख देखे।
सिरतोन! कोरोना महामारी के समे घलो कतकोन मनखेमन सुवारथ-लालच म परे हें। अइसन मनखेमन ल बोधकथामन ले थोकिन सीख ले बर चाही। ईमानदारी से हमन अपन हाथ ल सफ्फा रखबोन, बिन काम के फोकटइया घर ले बाहिर नइ निकलबो, जइसे डॉक्टरमन काहत हें वोइसने मास्क पहिरबो, सेनिटाइटर ल बउरबोन त कोरोना का वोकर ददा-बबा ह घलो जादा दिन हमरमन के तीर म नइ रहय। पूछी उठा के भाग जही।
मितान! आज के जमाना ह पइसा के पीछू भागत हे। ‘बाप बडक़ा न भइया, सबले बडक़ा रुपइया’ के समे म थोकिन पइसा आथे तहां हमन सगा-सोदर का, अपन सग्गे भाई-बहिनी से मुंह मोड़ लेथन। सियान दाई-ददा ल बिरद्धाआसरम म छोड़े म सरम-संकोच नइ करन। फेर, आज कोरोना ह हमन ल अपन घर-परिवार के महत्तम ल अउ जादा सिखा दे हे। हमन ल बता दिस के ये जिनगी के कोनो ठिकाना नइये। पइसा देके ऐला नइ बिसाय जा सकय। अइसन म पइसा नइ, बल्किन सबो रिस्तामन के महत्तम ल समझे बर परही।
सिरतोन! अति करबोन त के दिन बाचबो। परन दिन के जवइया, आजे चल देबोन। संग म घर-परिवार अउ अरोसी-परोसीमन ल घलो ले जाबोन। देखव अउ समझव तो पाहू के ये समे जउन परान बचाय बर हाहाकार मचे हे, वोकर बर हमिचमन जादा जिम्मेदार हंन। ये झन भूलव के समे तो गुजर जथे, फेर ‘करनी’ ह रहि जथे। अभु के समे सावधानी बरते, एक-दूसर के सहयोग करे अउ हिम्मत बनाय रखे के हे।
मितान! कोरोना के सेती कतकोन लोगनमन अपन सब कुछ गवां दिस। नौकरी छूट गे। अपनमन से सदा बर दूरिहा होगे। खाय बर मोहताज होगे हें। अइसन म जउन लोगनमन हमरमन ले दूरिहा चलदिन, वोकरमन के जिनगी से सबक ले बर चाही।
‘चल संगी देवता ल मनाबो, मया के फूल चढ़ाबो, ये तन के कांही नइये भरोसा, दरसन पा के आबो।’ फेर, मंदिर-देवाला तको बंद हे। अइसे म समझदारी-सावधानी म भलई हे। इही म सबो के हित समाय हे। तभो ले कतकोन लोगनमन नइ समझत हें। सरग जवइयामन के जिनगी ले सबक नइ लेवत हें, त अउ का-कहिबे।