अंतस अपन उजरा लेे

किताब के गोठ

अंतस के भाव ल ओगराय के कलतोन माध्यम हे। जइसे गीत- नाच, अभिनय, चित्रकला, मूरतिकला, साहित्यस संगीत आदि। सबो म साहितय पोठ माध्यम आय। साहित्य के घलो कतकोन विधा हे। जेमा कविता परमुख हे। कवितामन के सुख, दुख हांसी-ठिठोली, मया, रिस, जय-पराजय, सोग-पीरा सबल झिरिया, कस झुर-झुर-छुरझुर ओगराथे। कवि के मन के गोठ जब जनजीवन के सुख-दुख म संघेर के सिरजन करथे तब सिरजन ह लोक के हो जथे अउ वोमा लोक के दरसन होथे। लोक छन्द म सिरजे भाई राजेस चौहान के छत्तीसगढ़ी गीत संग्रह ‘चल गीत मया के गा ले’ अइसने लोक मय सिरजन आय। ये संग्रह के गीतमन म लोक के आस हे, लोक के बिसवास हे अउ संस्करीति के सांस हे।
कवि/साहित्यकार समाज के सगज पेहरूवा होथे। समाज ल जइसे देखथे, तइसे लिखथे। अपन सिरजन ले समाज म लोक चेतना ल जगाथे। लोगन ल अंधियार ले निकाल के अंजोर म बाट धराथे। कवि भाई राजेस चौहान परंपरा के पोसक के संगे-संग नवीनता के गायक ए। परंपरा के मुताबिक संग्रह म राजीव लोचन, महापरभु वल्लाभाचार्य के संगे-संग छत्तीसगढ़ के गांधी पंडित सुन्दरलाल सरमा के गुनाम करत परमारथ के दिया बारत कहिथे-
परमारथ बर अपन भाग्य के,
मेट डारीन जेन पाय लकीर।
जनम पाये गौंटिया के घर,
फेर जिनगी बनके जिईन फकीर।
परमारथ के रद्दा म रेंग के ही मनखे महान होथे। बिन सेवा के सोर नइ होय, न नाव होय। सेवा सतकरम से ही मनखे संत के पदवी पाथे। मनखेपन ले बड़े इहां अउ कोनो धरन नइये। सतकरम ह मनखे पहिचान आय-
मनखेधरम ले बड़ा नइ होय,
मनखे के करम देथे पहिचान।
जेन धरम ल बड़े बताथे,
तेन भटकावत हावय जान।
गरीब गरीबे होत जाते हे अउ बड़हर ह बड़हर। ऐहा कइसन बिकास आय। कवि के मन के पीरा देखव-
हमर छितका कुरिया, उंखर महल अटारी। हडिया उतान हमर, उंखर रोज देवारी। उंकर जिनगी हरियार, हमर सुक्खा पाना। देख भइया अलकरहा आगे जमाना।
आज हमर समाज ह जतके पढ़त-लिखत जावत हे, ओतके अढ़हा कस अलकरहा बुता करत हे। आज नारी-परानी के इज्जत सरेआम लुटावत हे। बेटी ल कोख म मार देय जाथे। बेटी बचाव-बेटी पढ़ाव के नारा ल नारा बन के रहिगे-डहर चलत लुटावत हे, नारी के अस्मत ह। रक्छक भक्छक बनगे, फूटके अब किसमत ह।