सरद पुन्नी के महिमा

परब बिसेस

हमर देस-राज म हमर संस्करीति रचे -बसे हावय। हर परब के बिसेस महत्तम हावय। ऐमा एक परब सरद पुन्नी हे। कुंआर महीना के पुन्नी ल सरद पुन्नी के नांव ले जाने जाथे। हिंदू धरम म पंचांग के अनुसार वइसे तो हर महीना के बिसेस होथे। अइसने रितु हे सरद।
गोस्वामी तुलसीदास ह रामचरितमानस म भगवान राम अउ लछमन के बीच संवाद जउन ह किसकिंधा कांड म सरद रितु के बरनन अउ महत्तम के बारे म लिखे हावय। जेन रितु के राम भगवान ह अपन मुख से वोकर बिसेसता अउ महत्तम ल बताय हे तेन रितु ह बिसेस रइबे करही।
बरखा बिगत सरद रितु आई।
लछिमन देखु परम सुहाई।
फूलें कास सकल महि छाई।
जनु बरषॉं कृत प्रगट बुढ़ाई।
उदित अगस्ति पंथ जल सोषा।
जिमि लोभहि सोषइ संतोषा।
सरिता सर निर्मल जल सोहा।
संत हृदय जस गत मद मोहा।
रस-रस सूख सरित सर पानी।
ममता त्याग करहिं जिमि ग्यानी।
जानि सरद रितु खंजन आए।
पाइ समय जिमि सुकृत सुहाए।
पंक न रेनु सोह असि धरनी ।
नीति निपुन नृप कै जसि करनी।
जल संकोच बिकल भइॅं मीना।
अबुध कुटुंबी जिमि धनहीना।
बछरभर सिरिफ सरद रितु के पुन्नी के तिथि के चंदा ह अपन सोलह कला ल धारन करे रइथे। ऐकर सेती सरद रितु के बिसेस महत्तम हाबय। पुन्नी के रतिहा घरो-घर बिसेसकर अब सिरिफ गांवमन म कीरतन-भजन गाए जाथे अउ तसमई चुरो के चंदा के परकास म अंगना अउ छानी म रखे जाथे। रतिहा या भिंसरहा वो तसमई के परसाद ल दवई के रूप म घर के लोगनमन अउ आरा-परोस म बांटे जाथे, काबर के रतिहा चंदा अपन सोलह कला के संग उगे रइथे अउ हमर धरती ले बहुत तीर म आ जाथे। ए रतिहा चंदा के परकास म अमरित के धारा बोहात रइथे। जेकर सेती तसमई ल चंदा के परकास म रखे के बिधान हावय।
कईठन दवई ल सरद पुन्नी के रतिहा खाय के बिधान बनाय गे हे। आयुरवेद गरंथ म घलो पढ़े बर मिलथे। काबर के सरद पुन्नी के रतिहा चंदा के परकास म चिकित्सकीय गुन रइथे।
कईझन बैद महाराजमन सरद पुन्नी के रतिहा जीवन रछक बिसेस अउसधी ल बना के रोगी के उपचार करे बर तसमई के संग मिला के खवाथें। सरद पुन्नी ले ही कातिक नहाय के महीना घलो सुरू हो जाथे जेहा कातिक पुन्नी तक रइथे। ए परकार ले देखा जाय त सरद रितु अउ पुन्नी के अति महत्तम हे। चाहे वो गोस्वामी तुलसीदास के रामचरितमानस म होवय, चाहे आयुरवेद गरंथ म, चाहे बैद महाराज के उपचार म, चाहे पराकरीतिक उपचार म सरद पुन्नी हमन बर बिसेस हे।