नवा जमाना आइस त बहुत कुछ छुटिस!

सदियों से सामाजिक परंपरा, दकियानूसी रीत-रिजाव अउ रूढि़वादी नियम-धियम म बांधय-छंदाय भारतीय समाज म बदलाव ह कोनो आसान काम नोहय। छत्तीसगढ़ समेत कतकोन परदेसमन म समाज ह न सिरिफ अपन मनमानी करथे, बल्किन मानवता ल सरमसार करइया फइसला घलो सुनाथे।

मितान! राजधानी रायपुर के उत्कल समाज इकाई ह ‘बिहाव, मंगनी अउ छट्ठी’ जइसन कारयकरममन म मांस-मदिरा परोसे बर रोक लगा के बने काम करे हे। सबो समाज ल नवा रद्दा देखाय हे। त ये फइसला ल सबो ल सराहे बर चाही। अइसन कुरीति ल सबो समाज ले दूरिहाय बर चाही। कहिथे न ‘एक पथरा तो जोर से उछालव यारों, बादर म घलो छेदा हो सकत हे।’
सिरतोन! नसा ह नास के कारन ए। बिहाव अउ दूसर उत्सव म मांस-मदिरा परोसे ले लाखों रुपिया के फिजूल खरचा होथे। गरीब परिवारमन बर खरचीला उत्सव ह ‘अभिसाप’ बन जथे। दारू-मदिरा पीये ले झरगा-झंझट के हालत बन जथे। ‘रंग म भंग’ पर जथे।
मितान! बर-बिहाव, मंगनी-जगनी, छट्ठी-बरही ह खुसी मनाय के मउका होथे। आपसी परेम, भाईचारा, हंसी-ठिठोली के माहौल होना जरूरी हे। तेकर सेती महंगई के समे म फिजूलखरचा ल रोके अउ साकाहार ल बढ़ावा देय बर उत्कल समाज ह जउन फइसला ले हे, वोहा सबो समाज बर मिसाल हे। उत्सवमन म सारवजनिक रूप ले मांस-मदिरा परसोई जइसन नियममन ल बंद करे के काम बहुत पहिली होय जाय बर रिहिस हे, फेर ऐकर बर समाजमन म उदासीनता अउ बिरोध आजो नजर आथे। वइसे हाल के बछरमन म कतकोन समाज ह कुछ-कुछ बढिय़ा काम घलो करे हें। जेमा सामूहिक बिहाव, फिरकापरस्ती समाप्त करके आपस म रोटी-बेटी के संबंध जोड़ई, उच्च सिक्छित नोनी-बाबू के परिचय सम्मेलन के परंपरा सुरू करई आदि सामिल हे।
मितान! सदियों से सामाजिक परंपरा, दकियानूसी रीत-रिजाव अउ रूढि़वादी नियम-धियम म बांधय-छंदाय भारतीय समाज म बदलाव ह कोनो आसान काम नोहय। छत्तीसगढ़ समेत कतकोन परदेसमन म समाज ह न सिरिफ अपन मनमानी करथे, बल्किन मानवता ल सरमसार करइया फइसला घलो सुनाथे। समाज के मनमाने फइसला के सेती न जाने कतेक परिवारमन के खुसी उजड़ गे हे। खासतौर ले सामाजिक नियममन के उल्लंघन बर तो समाज बहुतेच सख्त रुख अपनाथे। सामाजिक बहिस्कार ले ककरो आज तक न भला होय हे, अउ न होय सकय।
‘जोत से जोत जलावत चलव, परेम के गंगा बोहावत चलव। रद्दा म आवय जउन दीन-दुखी, सब ल गला लगावत चलव।’ जब परिवार म सांति, समरिद्धि लाय बर हे, समाज म आपसी भाईचारा अउ एकता ल मजबूत करे बर हे, तब रूढि़वादी मान्यता, दकियानूसी रीत-रिवाजमन ल छोड़े बर परही। नवा दौर म नवा सोच के संग नवा रद्दा बनाय बर परही। समे मुताबिक सामाजिक बेवस्था म बदलाव होय बर चाही। फेर कतकोन समाजमन म नइ होवत हे, त अउ का-कहिबे।