दरूहा बना के मरई ल बंद करव

सराबबंदी के अपन वादा ल जल्दी से जल्दी निभाय बर चाही

जु न्ना सरकार ह छत्तीसगढ़ के सिधवा जनता ल दारू पीया-पीया के निठल्ला अउ दरूहा बना के मारत रिहिस। वोहा अपन चुनावी वायदा म सराबबन्दी करे के बात कहे रहिस। फेर कभु नइ करिस। इहां के जनता ल दारू पियाय अउ जीव ल ले बर अड़े रिहिस। छत्तीसगढ़ म दारू दुकान ल पहली नीलामी म लेके कोचियामन चलावत रिहिन। तहां ले सरकार ह बीड़ा उठाव लिस। छत्तीसगढ़ म सात सौ ले ज्यादा दारू दुकान हे। हर साल 1200 लाख लीटर दारू बिकथे। एकर ले 3900 करोड़ रुपिया के कारोबार होथे।
जुन्ना सरकार ह एक कोती हेलमेट ल दुघरटना के बचाव बर जरूरी बतावव ऐहा बने बात रिहिस। फेर, पुलिसमन ऐला लेके पइसा वसूली अभियान चलावत रिहिन। सबले ज्यादा दुरघटना दारू पी के गाड़ी चलाय ले होथे। दारू ह तो सब दुरघटना अउ अपराध के कारन आय। तभो ले जुन्ना सरकार ह दारू बेचे बर काबर अड़े रिहिस। तभे तो छत्तीसगढ़ ल दारू अउ दरूहा के नांव ले देसभर म अलग पहिचान मिल गे हे। अब नवा सरकार के जिम्मेदारी हे ए दाग ल मेटाय के। सराबबंदी के अपन वादा ल जल्दी से जल्दी निभाय बर चाही।