झरझरा दाई

आवव मोर गांव

ग रियाबंद ले लगभग 60-65 किलोमीटर के दूरिहा म नानकुन गांव धुरसा (मुरमुरा) बसे हे। गांव ह जंगल के तीर म हे। गांव के डोंगरी म दाई झरझरा अपन सुग्घर रूप ल साज के डोंगरी भीतर डेरा लगाके बइठे हे। जेन ल लोगनमन दाई झरझरा रानी के नाव से मानथें। डोंगरी के तीर म बसे जम्मों गांव के मनखेमन जुरिया के दाई के पूजा-पाठ करथें। लोगनमन के मानना हे कि ए दाई झरझरा रानी ह दाई जतमाई के पहिली रूप आय। दाई जतमाई ह सबले पहिली इही डोंगरी म बिराजे रिहिन। वोकर बाद ए जगा ल छोड़ के कुसुम पानी गायडबरी म जाके बिराजे हे।
डोंगरी ह हरियर-हरियर रूख-राई, जंगल-झाड़ी ले सजे हे। जिहां बारो महीना जुड़ पुरवइया चलत रथे। लोगनमन ए जघा म पिकनिक पारटी म जाके सुग्घर आनंद लेथें। चइत अउ कुंवार नवरातरी म सैकड़ों भगतमन अपन मनोकामना पूरा करे बर जोत जलाथें। झरझरा दाई के दुवारी म सुग्घर झरना हे। 12 फीट ऊंच ले पानी गिरथे। झरना के खाल्हे एक अचरित सिलालेख हे। सिलालेख के थोरकिन अउ खाल्हे म पथरा के बीचों-बीच एकठिन गड्ढा हे। जेमा बारो महीना पानी रहिथे। दाई झरझरा के दुवारी म बघुवा, भालूमन के बसेरा हे, जेन ल लोगनमन माता के रखवार बताथें।