करहीभदर के बइला बजार

आवव मोर गांव

बालोद ले पंदरा किमी दूरिहा धमतरी रद्दा म करहीभदर गांव हे। इहां चालीस ले जादा बछर ले मवेसी के लेन-देन के बजार लगथे। ऐकरे सेती ये गांव ह बइला बाजार के नांव ले परसिद्ध हावय। आजकाल तो बहुतझन किसान मन आधुनिक खेती ल अपना ले हें। टेक्टर, हारवेस्टर, थेरसर के संग खेती करत हावंय। तभो ले खेती- किसानी बर बइला के मांग हावय। जेठ के महीना सुरू होथे त खेती – किसानी ले जुड़े लोगनमन खाू- कचरा, पेरा धरई. कांटा-खुटी बिनई सुरू कर देथें। संगे-संग बइला के लेन-देन,अदला – बदली घलो सुरू कर देथें।
पहिली करहीभदर बइला बजार मंगल के दिन भराय। फेर, भीड़ ल देख के अब दू दिन सम्मार अउ मंगल के भराथे। किसान अउ बेपारी सोमवार ले अपन मवेसी लेके पहुंच जथें। मंझनिया तक लाट के लाट बइला सकला जथे अउ लेन-देन सुरू हो जथे। जउन संझा बेरा तक चमचमा जथे। लेन-देन रात म घलो चलथे। दूसर दिन मंगल के बिहनिया ले मंझनिया तक चलथे। संझा होत- होत सब अपन-अपन घर कोती चल देथें। बइला बजार म तीर-तखार गांव के संगे- संग दुरूग संभाग, बस्तर, कोंडागांव, औंधी, गोंदिया, आमगांव, महारास्टर अउ ओडिसा सीमा ले बेपारी आथें।
जइसे पंचायत ह साप्ताहिक बाजार के ठेका देथे। वइसने किसम के बइला बजार के घलो ठेका होथे। ठेकादारमन इहां बेचेबर आय बेपारीमन ले सेवा सुल्क लेथें।। लेनदेन पाछू वैध पक्का रसीद घलो इहा ले देय जाथे जउन ल सासन ले मान्यता मिले रहिथे। लेनदेन के बेरा दलालमन (कोचिया) बडे जिम्मेदारी रहिथे। कोनो किसान अपन मवेसी बेचे बर या अदला बदली करे बर चाहथे त वो कोचियामन ले मिलथे। कहे जाय त पूरा लेन देन ला कोचियामन करथं। बइला बजार म बइला, गाय, भइंंसी, भइंसा लेय-देय बर लाय जाथे। बइला बाजार बर दुरूग के उतई अउ डोंगरगांव तीर खेरथा बाजार घलो परसिद्ध हे।
बइला बजार म बइला, गाय, भइंंसी, भइंसा लेय-देय बर लाय जाथे। बइला बाजार बर दुरूग के उतई अउ डोंगरगांव तीर खेरथा बाजार घलो परसिद्ध हे।