देस के आत्मा गांव अउ अन्नदाता किसान के होवत हे दुरगति

का- कहिबे

मि तान! मनखे के सबले बडक़ा कमजोरी होथे वोकर बढ़ई। बस, बात के अंगाकर रोटी संग आधा सच अउ आधा लबारी के पताल के चटनी- आमा के अथान परोस के ऊपर से थोकन खुसामद के भुंजाय मिरचा दे दव। ये उपाय ल अपना के बाद आपमन बड़़ असानी से कोनो भी मनखे ल फुसला सकथव। आपमन देखे होहू आजकाल के कतकोन चलाक परेमीमन ये अब्बड़ जुन्ना बिधि (उपाय) ल सुन्दरीमन ल फुसलाय बर परयोग म लेवत रहिथें अउ हमर नेतामन तो ये तरीका ल भोली-भाली जनता, किसान, गांववालेमन ल पटाय म काम लावत रहिथें।
सिरतोन! हमर देस के आत्मा गांव ल कहिथें अउ गांव वालेमन ह बहुतेच सिधवा, भोला-भाला होबेच करथें। वोमन ककरो भरोसा कर लेथेंं। काबर के वोमन छलकपट नइ जानंय। तेकर सेती छपकपट करके ऐमन ल फुसला लेथें। धोखा दे देथें। ठग लेथें। लबारी मार के लूट लेथें।
मितान! आपमन कोनो गांववाले ल थोकन मुंह ल उतार के, थोथना ल नवा के, रोनहू सकल बना के, भावुक स्वर म कइहू के आपमन मोर आत्मा अव। बस, फेर देखहू। आत्मा सब्द सुनके मनखे तुरते जन्म के सगा-संबंधी बरोबर हो जथे अउ अइसन भावुक, सिधवा मनखे ल तुरते फुसलाय बहकाय जा सकथे।
सिरतोन! हमर बबा काहय के भावुकता म कोकरो से वादा नइ करे बर चाही अउ गुस्सा म ककरो से वादा नइ तोड़े बर चाही। हमर नेतामन अजादी के बाद से सरलग कहत रिहिन के भारत के आत्मा गांवमन म बसथे या फेर भारत ह खेती-किसानी के देस ए या सच्चा भारत गांवेचमन म मिलथे। ये सब बात ह सिधवा, भोले-भाला गांववालेमन ल भावुक बना देथे। अउ दूसर कोती हमर नेतामन नीति-नियम अउ बजट बनाय के समे सबले जादा गांव-गंवई डहर ले आंखी मूंद लेथें।
मितान! सब मानथें के भारत गांवमन के देस ए। हमूमन नानपन ले इही पढ़त-सुनत आवत हन। त फेर गांव अउ गांववालेमन के सबले जादा दुरगति काबर होवत हे? किसानमन ल बात-बात म खून के आंसू काबर रोय बर परथे? गांव ह देस के आत्मा हे त फेर आत्मा के दुरगति काबर होवत रिहिस हे? काबर देस के किसानमन ल धरना, परदसन करे बर परथे। काबर अन्नदातामन ल लउठी-गोली खाय बर परथे? आखिर किसानमन ल वोकरमन के मेहनत के वाबिज फल काबर नइ मिलय? अपन अन्न-फसल ल अपन दाम म काबर नइ बेच सकंय? आखिर किसानमन के अन्न-फसल के दाम सरकार अउ बेपारीमन काबर तय करथें। जबकि कंपनी, कारखाना मालिकमन अपन बनाय सामान ल अपन हिसाब से दाम तय करके बेचथें।
वाह! किसानमन ल सिधवा, कमजोर समझ के सबो वोकरमन ऊपर मनमानी करत हें। जब जेकर मेहनत से उजाय अन्न ल खाथें, वोकर ऊपर गुरराथें-गरजथें। आज देस म किसानमन ल लेके ‘उल्टा चोर कोतवाल ल डांटे’ के हालत हे। किसानमन ल सबो फुसलाय म लगे रहिथें, त अउ का-कहिबे।