कल्यान सेन : लता मंगेसकर ल छत्तीसगढ़ी म गवइया

सुरता म

वीनावादिनी के भेंट म हमन लता मंगेसकर ल पाए हाबन। वोकर परसिद्धि दुनियाभर म हवय लताजी हर देस के अड़बड़ अकन भाखा म गाए हवय। अब वो हर 10-15 बछर ले गाए बर छोड़ देहे। फेर कल्यान सेन ह लताजी ल छत्तीसगढ़ी म गवाय रिहिस। स्व. कल्यान सेन हमर छत्तीसगढ़ी के परसिद्ध संगीत निरदेसक रिहिस हे। बालीवुड के बड़े संगीतकार संकर जय किसन, राहुल देव बरमन, रवीन्द्र जैन, लछमी प्यारे के वोहा संगत करे रिहिस। देवानंद ले वोकर घरेलू संबंध रिहिस। मो. रफी, महेन्द कपूर, किसोर कुमार, मुकेस के संग म गायन करे रिहिस। परसिद्ध सिलीयर रामायन म वोहा रवीन्द्र जैन संग पास्र्व गायन करे रिहिस।
कल्यान सेन ह गायन के संग तबला वादन म घलो माहिर रिहिस हे। कईठन फिलिम म वोहा संगीतकारमन संग तबला बजाय रिहिस। भजन समराट अनूप जलोटा ह वोकर बड़े भाई जइसे रिहिस। जग में सुंदर है दो नाम’ भजन ल कल्यान सेन ह तइयार करे रिहिस, तेला अनूप जलोटा ह गाए रिहिस। अइसने अनूप जलोटा कईठन भजन गाए रिहिस। अनुराधा पोड़वाल, सान अउ सोनू निगम संग कईठन संगीत के रचना करे रिहिस।
कल्यान सेन के ददा स्व. अरूप कुमार ह खैरागढ़ संगीत विस्वविद्यालय के उप कुलपति रिहिस। संगीत के छेत्र म देसभर म वोकर नाव रिहिस। वोकर महतारी स्व. अनीता सेन ह जाने माने ठुमरी गायिका रिहिस। वोकर भाई सेखर सेन आज परसिद्धि के फिलिंग म हवय। संगीत नाटक अकादमी के अध्यक्ष हे।
कल्यान सेन ह छालीवुड के फिलिम म घलो संगीत दे हे। मयारू भऊजी, जय महामाया अउ आने। ‘भकला’ नाव के फिलिम म वोहा संगीत दे रिहिस हे। वोकर संवाद ल मेहा लिखे रेहेंव अउ सरपंच के रोल करे रेहेंव। भकला फिलिम ह ये पाय के मील के पथरा बन गे कि लता मंगेसकर ह वो फिलिम म गाना गाए रिहिस। गीत के बोल रिहिस ‘छूट जाही अंगना दुआरी’ ये ह कल्यान भाई के गजब बड़े धन हे। जेला हमन ल जतन करके रखे बर चाही। कल्यान सेन ह गजब अकन नाटक म घलो पाठ करे हे। फिलिम म घलो काम करे हे। स्व. दुस्यंत कुमार के करांंतिकारी गजल जेला संगीत म ढालना गजब कहिन हे। काबर कि वोकर गजल म सिंगार नइ रहय, सुख्खा भाखा रहय, तेला संगीत म सजा के सुग्घर गायन करवाय। हरिवंसराय बच्चन के मधुसाला ल संगीत म सजा के पोरोगराम करय।