तीजा तिहार म मिलथे मइके म अब्बड़ मया-दुलार

तीजा म उपवास निरजला रहे जाथे। माने बिना पानी पिये उपवास रहना। तीजा के रतिहा 12 बजे के बाद ही पानी पिये के बिधान हे। एक बार सुहागिनमन ये उपवास ल सुरू करथे त बीच म उपवास रहे बर नइ छोडय़। तीजा के रतिहा भर भजन-कीरत कर रतजागा करे जाथे। ये उपवास ल कुंवारी कन्या अउ सुहागिन माइलोगनमन रहिथे।

तीजा के दिन माइलोगनमन उमा-महेस्वर के पूजा-पाठ करथें। अपन सादीसुदा जिनगी म अखंड सौभाग्य, सुख-समरिद्धि, धन-धान भरे घर-दुआर अउ सफलता के आसीस भगवान से मांगथे। हर बछर तीजा के तिहार ह चंदा के कालगन नाम निरधारित होथे।
तीजा उपवास के नियम- ए उपवास ह दूज के रतिहा ले दतुअन से दांत साफ करके के बाद असनाने के बाद संकलप करके सुरू होथे । जेहा चउथ के बिहनिया तक रहिथे।
तीजा म उपवास निरजला रहे जाथे। माने बिना पानी पिये उपवास रहना। तीजा के रतिहा 12 बजे के बाद ही पानी पिये के बिधान हे। एक बार सुहागिनमन ये उपवास ल सुरू करथे त बीच म उपवास रहे बर नइ छोडय़। तीजा के रतिहा भर भजन-कीरत कर रतजागा करे जाथे। ये उपवास ल कुंवारी कन्या अउ सुहागिन माइलोगनमन रहिथे।
तीजा उपवास परदोस काल म करे जाथे। दिन बुड़े के बाद तीन मुहुरत ल परदोसकाल कहे जाथे। ये समे ह दिन अउ रात के मिलन समे रहिथे। हस्त नछत्र म पडऩेवाला ये तिहार के उपवास म माता पारवती अउ भगवान भोलेनाथ के संग गनेसजी के मूरति करिया माटी अउ रेती से अपन हाथ ले बनाए जाथे।
ए दारी तीजा ह अंगरेजी कलेंडर म सितंबर महीना के 18 तारीख दिन सोमवार के पड़त हावय। ए तिहार के छत्तीसगढ़ राज म बिसेस महत्तम हावय। तीजा बर ददा अउ भाईमन अपन बेटी, बहिनीमन ल मइके लेवा के लाथे। तीजा के एक दिन आघू दूज के रतिहा पारा-परोस के कका-बड़ा के घर करू भात के बुलऊआ बेटी- माईमन ल पहिली ले रहिथे। फेर, तीज के दिन निरजला उपवास रहिके चउथ के बिहानिया पूजा-पाठ के बाद फरहार करे जाथे। फेर घरो-घर उपवास के बाद बासी खाय बर बुलउवा रहिथे। दाई ह अपन नोनी म ल अपन सक्ति अनुसार नवा लुगरा के भेंट देथे जेहा दाई के अपार मया ल परगट करथे। तीजा म मइके के लुगरा के अति मायने हावय।