जवाब

नानकीन किस्सा

लता मैडम नवा-नवा किरायादार बन के कालोनी म आय रिहिस हे। वोकर आय के दू महीना पहली उही कालोनी ले एकझन नोनी ह उढ़रिया भगागे रहय। ये बात के पता वोला दूसर दिन ही चल गे। दू-चार दिन म अरोस-परोसवालीमन संग चिन-पहिचान घलो बना डरिस मैडम ह। फेर वोला बिमला के सुभाव ह मन नइ आइस। काबर कि वोहा अपन बाकी अरोसिन-परोसिन के चुगली-चारी करय।
एक दिन के बात आय। लता ह अपन दुवारी ल बुहारत रहय ओतकी बेरा जेन नोनी ह भागे रहय वोकर दाई ह उही मेर ले नाहकिस। लघियांत उही बेरा व वोकर परोसिन बिमला ह लता कना आके ओरियाइस, अई! जानथस मैडम, ऐकर टुरी ह एकझन करबेलवा मुंहा टुरा संग उढ़रिया भगागे हे।
लता ह वोकर बात ल अनसुना करत बुहारत रहय। ताहने फेर बिमला के पुरान चालू होगे। अब जमाना खराब होवत हे! का करबे। दाई-ददामन अपन लोगलइका ल बरोबर सिक्छा नइ दिही त अइसन होबे करही।
लता अपन बुहारी ल मढ़ाइस अउ किहिस- दीदी!तोर बेटी ल तो तैं बने सिक्छा दे रेहे होबे का ओ! फेर सुने हंव तोर नोनी तो घलो दू बछर पहिली भगाके बिहाव कर डरे हे का। कालीचे कुंती दीदी ह बताइस हे।
लता के मुंहु ले अइसन बात सुन के बिमला सकपकागे। वोकर मुंहू ले गोठ नइ निकलिस। लता ह वोकर दसा ल देख के वोला समझाइस। दीदी, कोनो दाई-ददा ह अपन बेटी-बेटा ल बिगड़े के सिक्छा नइ देवय। सबो ह अपन लोगलइका ल बने रद्दा म रेंगे बर सिखाथे। फेर, दुनियादारी के हवा म कोनो गलती कर डारही त वोमा वोकर दाई-ददा के का गलती हे। बिमला के मुंहु ले अउ गोठ नइ निकलिस। वोहा तुरते उही पांव लहुट गे।