आवाज ल सुनके ठीक निसाना म तीर चलाय कोदूराम वरमा ह

सिक्छा, कला, समाजसेवा के अलग अलग छेत्र म कोदूरामजी काम करके हमन ल रद्दा देखा के गे हे। अपन परिवार म महेस वरमा ल कलाकार बना के नवा पीढ़ी म कला के संस्कार डारिस। वोकर परम्परा ल सब मिलजुल के आगू बढ़ाय के संकलन कलाकारमन ले हें।

छत्तीसगढ़ सासन ह तीरंदाजी अकादमी ल कोदूराम वरमा के नाव म राख के अपन माटी के महत्तम ल दुनिया म बगरा दिस। कोदूराम वरमा कोन ये ऐला जाने बर सबो के मन म सुगबुगाहट होय लगिस। भूपेस सरकार के ये नाव धरे के काम के गजब बड़ई होइस ।
1 अपरैल 1924 के दुरूग जिला के गांव भिंभौरी म जनम होइस किसान बुधराम के घर एकझन लइका के नाव धरिन कोदूराम। पहली अइसने नाव धरे जाय धान के महत्तम जादा हे। कोदो के कमती। धान ल बोय बियासे बर लागथे। कोदो ह अपने अपन तियार हो जथे। ऐेकरे सेती गुन्निक बापमन सोच- बिचार के नाव धरंय। जउन ह बिन देखभाल के तियार हो जही तउने ह कोदूराम कहाही ।
भिभौंरी गांव के बड़े किसान के बेटा कोदूराम चौथी तक पढि़स। पढ़ते-पढ़त नाचा-भजन म मन लगा लिस। बाप ल संसो होइस, फेर कोदूराम ह, किसानी नइ करिस। वोहा छत्तीसगढ़ी लोककला बर जीवन ल अरपित कर दिस। पहली नाचा म परी बनिस। बाढि़स त जोक्कड़ बनिस। फेर, आगू चल के भजन गायक बन गे ।
‘तोर चरन मनावंव ओ
कोसिलया मोर दाई।
तोर महिमा ल गावंवओ
कौंसिल्या मोर दाई।
तोर कोरा म राम ह खेलिस
राजिव लोचन के माई।‘
छत्तीसगढ़ के बेटी, भगवान राम के महतारी कौसिल्या के जस गवैया कोदूराम ह बहुत नाव कमइस। आगू चलके करमा नचैया लइकामन ल तियार करिस। रास्टरपति ह वोकर करमा नाच ल देख के सम्मान करिस पचयासी बछर के उमर म कोदूराम वरमा ह दू घंटा करमा नाच लय।
छत्तीसगढ़ के मुख्यमंतरी भूपेस बघेल ह 2002 म गांधी विचार यातरानिकालिस। इही यातरा म कोदूराम वरमा ह गांव गांव म सब्दभेदी बान चलाके लोगन ल चकित कर दय। आंखी म पटी बांध के बान चलाने वाला ये समे म वोहा अकेल्ला रिहिस। वोकर बान चालन ल देख के दुनिया के माने हुए बानघारी लिवांराम ह गोड़ ल धर के किहिस ऐहा तो हमरो गुरु ए।
कोदूराम वरमा ह साधक कलाकार रिहिस। 90 बझर के उमर म 18 सितम्बर २०१८ के सरग सिधार गे। छत्तीसगढ़ म जब दुरूग जिला म साक्छारता अभियान सुरू होइस त 1994 म कोदूराम वरमा साक्छरता कलाकार के रूप म गजब काम करिस। राज्यपाल ह उनला सम्मान दिस। छत्तीसगढ़ी लोकमंच बर काम करइया कोदूराम वरमा ल अगासदिया पतरिका म बिसेस अंक निकाल के सम्मान दे गिस। उंंकर गांव म बड़े-बड़े कलाकार सकलइन। आदिवासी गांव झालम के कलाकार मन करमा नाचिन। कोदूररामजी ह खुद करमा नाच के घंटाभर देखइस। गीत-गाना, नाचना, साब्दभेदी बान चलाना के संग-संग नान-नान लइकामन ल सिखोवय अउ आगू बढ़ावय।