हमर बोली भाखा म… चुनई के मउसम म दल बदले के फइसन!

CG Election 2023 : ऐकरमन के नीति अउ नीयत के पोल खोलत रहेंव...

cg election 2023 : मेहा ‘वो’ पारटी ल छोड़ देंव। जेन ल मेहा कालीजुअर ले अपन मानत रहेंव। अब मेहा ‘ए’ पारटी के वफादार कारयकरता हंव, जेन ल मेहा कालीजुअर ले पराया जानत रहेंव। ऐकर नेतामन ल पानी पी-पी के कोसत रहेंव। ऐकरमन के नीति अउ नीयत के पोल खोलत रहेंव। वो जुन्ना पारटी म मोर दम घुटत रिहिस। जनता के सेवा करे के मउका नइ मिलत रिहिस। मेहा अब्बड़ अगोरा करेंव, फेर सब बेकार चलदिस। जब जनता के सेवा करे के मउका मोर ले छीनके दूसर ल दे दिस तब मोर हिरदय ह बगावत कर दिस। इहां आके मेहा सुकून महसूस करत हंव। पराया जान के जेन पारटी ल अब तक मेहा गरियावत रहेंव, उही ह अपन निकलिस।

CG Election 2023 : अतका सुनके एकझन मतदाता कहिस- का समे आ गे हावय, नेतामन ‘थारी के भाटा’ कस लुढ़कत हें। जिनगीभर अपन वफादारी के ढिंढोरा पिटइया अउ उद्देस्य बर मर-मिटे के कसम खवइयामन के हिरदय ह टिकट नइ मिले ले एकदम से कइसे बदलत हे। दलबदलू ल टिकट देके ए पारटी के नेतामन खुस हें, त टिकट नइ मिले ले तिलमिलाय नेता अउ वोकर समरथकमन धड़ामचौकड़ी मचावत हें।

दूसर मतदाता कहिस- सियानमन कहिथें के कभु न कभु घुरवा के दिन घलो बहुरथे। ऐमा अचंभा के कोनो बात नइए। काबर के आजकाल बदबदलूमन के दिन बहुरत हे। टिकट के लालच ल देखव, वफादारी ल घुरवा म फेंक दीन। ए पारटी अउ वो पारटी म अंतर सिरफ ‘टिकट’ के हे। जेमन राजनीति ल बेपार समझ के नेतागिरी करत हें, वोमन टिकट अउ कुरसी म नजर गड़ाय रहिथें।

CG Election 2023 : दलबदलू नेता ह काहत रहय- ऐहा दुस्मनमन के कुपरचार हे कि मेहा दलबदलू अंव। एक पारटी ले चिपके रहई ह तो वफादारी नोहय। आखिर, पारटी बड़का हे या फेर जनता! जउन पारटी जनता के सेवा करे के मउका नइ देय तेन ल छोड़ना ही धरम हे। मेहा घर वापसी करके घलो देख डरेंव, फेर कोनो फाइदा नइ होइस। इही दल बांचे रिहिस आय बर।

तीसर मतदाता कहिस- चुनई के मउसम म नेतामन के टेटका कस रंग बदलई, टिकट के लालच म दल बदलई ह तो फइसन होगे हे। नेतामन के कोनो बेलाबिचार नइ रहि गे हे। अइसन म मरना तो मतदातामन के हे। आखिर कोन ल वोट दंय। जेन ल वोट दिही, तेन ह पारटी नइ बदलही तेकर का गारंटी हे!